Os miners aragoneses esfienden o suyo futuro en Zaragoza

Os miners, refirmaus por a población aragonesa, reivindican en Zaragoza y en a siede d'o Gubierno d'Aragón o futuro d'os suyos puestos de treballo y d'as suyas redoladas.

Prencipio d'a manifestación

A las 10 horas en frent d’o Pabellón Principe Felipe de Zaragoza yera convocada a manifestación en esfensa d’a minería en Aragón. Os miners, plegaus dende o Baixo Aragón, chunto con familiars, amigos y toda a chent que ha quiesto solidarizar-se con ells dende as suyas redoladas y dende Zaragoza, han empecipiau a marcha a las 10:45 h. dende o citau puesto con una fuerte presencia policial que mesmo rodiaba a manifestación por os costaus. China-chana a marcha ha sumau mas chent dica plegar a unas 1.000 personas.

A manifestación ha estau bien colorida, con prous sinyals de sindicatos, sinyals republicanos y independentistas aragoneses asinas como pancartas a favor d’a pervivencia d’as redoladas mineras y d’a suya reindustrialización como guarancia d’o futuro t’as mesmas. Se i han chilau consignas combativas a favor d’os miners y a minería y contra os gubiernos aragonés de Luisa F. Rudi y espanyol de Mariano Rajoy y as suyas retalladas a o sector. Dende o puesto de salida, s’ha continuau por Av. Cesáreo Alierta, Pº Constitución, Pº Pamplona ent’a siede d’o Gubierno d’Aragón en o Pº María Agustín a on remataba la manifestación. Os miners han portau os suyos cascos, luces y monos de treballo.

Cabecera d'a manifestación

En rematar o recorriu, os presents han demandau a presencia d’a Presidenta d’o Gubierno aragonés, Luisa F. Rudi, que como yera d’asperar no i ha apareixiu. Dimpués s’ha leyiu o comunicau en o que s’ha criticau a perda de diners en o sector d’a minería y a suya repercusión en as redoladas baixoaragonesas que penden d’ella, criticando que i haigan diners ta Bankia y no t’a minería y t’a reindustrialización d’as redoladas, amás de criticar o falso compromiso d’o gubierno PP-PAR. S’ha zarrau l’acto cantando a canta de J.A. Labordeta “Somos” mientres se feba un acarrazo ciudadano entre os presents. Una delegación d’os miners ha iu t’o Concello de Zaragoza a reunir-se con J. A. Belloch, en calidat de senador.

Os miners continarán con a vada, asinas como con atras midas de presión como concentracions, talles de carreteras y zarre d’os accesos a las centrals termicas d’o país en venients diyas. D’a minería penden 600 puestos de treballo directos, asinas como muitos mas indirectos que son claus en istos momentos t’a pervivencia d’as redoladas mineras aragonesas ta evitar a suya despoblación y abandono. Maitín i habrá una marcha estatal en esfensa d’a minería en Madrit.

 

Pancartas reivindicativas

 

 

 

 

 

 

 

 

En a siede d'o Gubierno d'Aragón

 

 

 

 

 

 

 

 

 

Se canta "Somos" de J.A. Labordeta

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.