Os miners de Mequinenza mantendrán a suya luita dica que arriben as solucions

Qualques miners de Mequinenza s'enzarroron en o Pilar de Zaragoza dimpués de que Endesa se negase a cremar carbón de dita mina

Miners en Mequinenza. Foto: CHA

Miners en Mequinenza. Foto: CHA

Tres miners d’a interpresa Carbonífera del Ebro de Mequinenza, en a comarca d’a Cinca Baixa, s’enzarroron ahiere en a Basilica d’o Pilar, a on han pasau a nueit, dimpués de conoixer que Endesa se negó a cremar carbón procedent d’a mina an que treballan, dimpués d’os resultaus d’un informe que encargó a interpresa. A termica afirma que, seguntes dito estudeo realizau por a Universidat de Sevilla, iste mineral “danyaría grieument” as instalacions d’a central por o que no podeba cremar o carbón. Fa unas semanas, un informe d’o Centro d’Investigación de Recursos y Consumos Enercheticos d’a Universidat de Zaragoza y unatro d’a Universidat d’Oviedo aseguraban que o carbón no feba mal a la termica.

A mina de Mequinenza no produce carbón dende o pasau mes d’aviento. Dende alavez, toda a plantilla ye afectada por un ERE y qualques treballadors se quedarán sin garra ingreso en as venients semanas. “Unas quaranta familias directas y atras tanta indirectas penden d’o carbón en Mequinenza, en una población d’uns 2500 habitants ye una bestieza, no solament se tranca a mina, se tranca a cuenca minera”, declara a AraInfo, Alvaro Algueró, minero de Mequinenza, dende o suyo enzarre en Zaragoza. Algueró amuestra o descontento d’os miners con o gubierno d’Aragón, “o consellero Aliaga nos dició que solucionaría o tema d’Endesa, agora da por bueno o que diz a interpresa y nos deixa tiraus”.

Álvaro Algueró ha relevau iste martes, chunto a dos miners mas, a os suyos tres companyers que anueit s’enzarroron en o Pilar y encara desconoixen si o Cabildo Metropolitano les concederá autorización ta pasar unatra nueit allí. “Imos a continar movilizando-nos dica que belún d’o Gubierno d’Aragón u d’o Ministerio dé solución a iste afer”, adhibe Algueró ta recordar que “cal seguir luitando, a os obrers nunca no nos han regalau as cosas sin luitar”. Ista tarde celebrarán una asamblea en a mina de Mequinenza ta decidir as suyas proximas accions.

Incertidumbre en mas de medio centenar de familias de Mequinenza

Tanto IU como CHA han amostrau o suyo emparo y solidaridat con os miners de Carbonífera del Ebro. “Dimpués de meses d’aspera, ista respuesta negativa agrava a situación d’incertidumbre en que viven mas de medio centenar de familias en Mequinenza. Dende CHA se pide a o Gubierno d’Aragón, y en concreto a o consellero Aliaga, “que deixe de mirar enta atro costau y actúe, que ta ixo ocupa un puesto en o Gubierno d’Aragón”.

O president de CHA, José Luis Soro, que ha visitau a os miners que se troban en Zaragoza, sinyala que “cal buscar una segunda opinión sobre a calidat d’o carbón y una solución t’a mina de Mequinenza” y critica que “o Gubierno PP-PAR no haiga estau capable de defender os intreses d’as familias mineras aragonesas” y ha criticau as parolas d’o consellero Aliaga en que diz “que se levaría un gran disgusto si Endesa no compra o carbón de Mequinenza”. Ta Soro “a decepción d’un consellero ye un sentimiento que no dará de minchar ni chenerará emplego” en a Cinca Baixa.

Soro considera que ni o Gubierno d’Aragón ni o Gubierno central han teniu voluntat ta solucionar os problemas d’as cuencas mineras aragonesas. “Levan meses retrasando respuestas y mantenendo a incertidumbre” y proposa que “activen un plan t’a reconversión laboral en a zona, faigan servir os diners de subvencions y plans ta chenerar nuevos chacimientos d’emplego y guarencien a economía d’a zona en os venients anyos dica que plegue o cambeo”.

Precisament iste viernes, en o pleno d’as Cortz d’Aragón, CHA preguntará a o consellero sobre as chestions que ha realizau y as solucions que proposa debant d’ista noticia tant negativa.

Fuent: http://arainfo.org/2013/11/los-mineros-de-mequinenza-mantendran-su-lucha-hasta-que-lleguen-las-soluciones/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.