Os partius politicos se comprometen a la sinyadura d’un Pacto aragonés contra a Pobreza en a venient lechislatura

O pasau lunes a FAS celebró un debat con uieto d'os partius que se presientan a las eleccions

Os representantes de ueito partius politicos contestoron a las preguntas. Foto: FAS

Os representantes de ueito partius politicos contestoron a las preguntas. Foto: FAS

En un debat organizau por a Federación Aragonesa de Solidaridat (FAS), y debant d’un publico de mas de 80 personas, os representants de Chunta, Ciudadanos, Ezquierda Unida, PAR, Podemos, PP, PSOE y UpyD manifestoron o suyo compromís de sinyar en a venient lechislatura un Pacto contra a Pobreza en Aragón.

A tarde d’o lunes 16 de marzo de 2015, os y as representants d’os partius politicos que se presientan a las eleccions d’Aragón contestoron a una decena de preguntas formuladas por as ONGD y por ciudadanos y ciudadanas sobre cooperación a o desenrollo, educación t’a ciudadanía global, comercio chusto, migracions y desenrollo y midas fiscals, entre atros afers.

En un debat compleixo, seguntes a FAS, con representants de ueito partius politicos, o periodista José Javier Rueda “aconsiguió mantener un ritmo achil y que os representants d’os partius respondesen con mensaches curtos a las preguntas planteyadas”. O debat discurrió con un “tono sereno”, encara que s’escalfó en qualques momentos, como quan se charró d’a LOMCE y l’asignatura d’Educación t’a ciudadanía u d’os criterios eticos en as crompas publicas.

“O debat en cheneral amostró que os partius coinciden en grans parolas como solidaridat u cooperación, pero difieren en o cómo y mesmo en o qué”, sostiene a FAS.

O 0,7% estió l’inicio d’ixe desencuentro dimpués de l’aparent consenso en a declaración d’intencions: “totz os partius acceptan que ista demanda reclamada por as ONGD dende fa mas de 40 anyos ye un horizont ideyal, pero difieren en o quán se va a fer una realidat en Aragón”.  Mientres CHA, Ciudadanos, Ezquierda Unida, Podemos y UPyD se comprometeban a aconseguir o 0,7% d’os presupuestos en a venient lechislatura, PAR, PP y PSOE afirmoron a suya intención d’ir abanzando enta ixe horizont, pero sin meter una calendata final.

S’abordoron atras qüestions como a competencia local en materia de cooperación a o desenrollo, en que totz os partius estioron d’alcuerdo que tanto comarcas como concellos puedan seguir exercendo politicas de cooperación menos UPyD, que proposó que todas as aportacions locals se chestionen a traviés d’un Fondo Aragonés de Cooperación a o Desenrollo.

“U como una propuesta concreta, que os partius dicioron que estudiarán, ta aplicar deduccions en o tramo de l’IRPF autonomico t’as donacions a las ONG socials y de desenrollo, igual que ya se fa en o tramo estatal de l’impuesto como traza de fomentar o refirme a las entidatz sin animo de lucro”, apunta a ONGD.

Una pregunta sobre a Educación t’o Desenrollo suscitó un debat sobre a acotolada asignatura d’Educación t’a ciudadanía y a LOMCE, an que quedoron de manifiesto posturas irreconciliables d’os diferents partius. “As ONGD creyemos que ta que se superen as situacions de pobreza y desigualdat, no ye prou con l’aduya a o desenrollo que, cal un cambeo estructural, una transformación global t’a quala cal una ciudadanía conscienciada y critica. Por ixo seguiremos esfendendo o necesario papel d’a Educación t’a ciudadanía global”, sostiene a FAS.

Dos preguntas relacionadas con a crompa publica etica suscitoron polemica entre PP y PAR y parte d’o publico. “Totz dos partius qüestionoron a capacidat real ta incluir clausulas eticas en os pliegos d’os contractos de l’Administración, mientres que atros partius y qualques personas asistents a l’acto han meso eixemplos de cómo sí ye posible, pues atras Administracions lo son fendo, contrimostrando que a inclusión de criterios eticos en as crompas de l’Administración ye una qüestión de voluntat politica”, exposa. A diputada d’IU recordó que han presentau multiples propuestas en iste sentiu, y como todas, han estau refusadas. Y o representant d’o PSOE replegó o guant ta aconseguir que en a nueva lechislatura as Cortes incluigan criterios de crompa etica, “dando eixemplo dende a casa d’os aragoneses”.

Amaneixioron atras qüestions que afectan a o debat sobre ciudadanía global, como a luita contra os paradisos fiscals, o risgo d’o TTIP (l’Alcuerdo Transatlantico t’o Comercio y a Inversión que se ye negociando entre a UE y os EEUU), as causas d’a desigualdat y a pobreza… y tamién os nuevos conceptos de codesenrollo y de ciudadanía transfronteriza, dillá d’as clasicas nacionalidatz acotadas entre as buegas d’un país.

A Federación Aragonesa de Solidaridat asegura que seguirá analisando cómo se refleixan as propuestas y afirmacions d’os partius en os programas electorals y recordando a las formacions politicas os compromisos en materia de cooperación asumius con os ciudadanos y ciudadanas.

“Y prou que -concluye-, dimpués d’as eleccions se meterá a treballar con as fuerzas que tiengan representación en as Cortes d’Aragón” ta aconseguir a sinyadura d’un Pacto aragonés contra a Pobreza, “a favor d’o cómo s’han manifestau en iste debat os suyos representants politicos”.

Fuent: http://arainfo.org/2015/03/los-partidos-politicos-se-comprometen-a-la-firma-de-un-pacto-aragones-contra-la-pobreza-en-la-proxima-legislatura/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.