“Os Pilars” ya tienen programación oficial

Entre o 5 y o 14 d'octobre Zaragoza vive as suyas fiestas

cartelA bells pocos diyas d’o empecipie d’as Fiestas d’o Pilar de Zaragoza, ya se conoix a programación oficial. En a presentación feita en o Concello de Zaragoza o maitin d’o lunes s’ha anunciau a retallada d’un 2 % en o presupuesto d’as fiestas, deixando-lo en un total de 1.5 millons d’euros.

Bi habrá 40 scenarios oficials que tendrán bells cambios respecto a l’anyada pasada. O paseyo Independencia tornará a estar peatonal mientres os diyas de fiesta y se instalará en a Plaza Espanya o “tragachicos”, un esbarizaculos de 5 metros d’altaria que surte d’un chigant. A l’atro cabo d’Independencia, en a Plaza Aragón, bi serán as casas rechionals que, dimpués d’a mala experiencia de l’anyada pasada en Val d’Espartera, tornan t’o centro.

A carpa d’o Ternasco d’Aragón prencipia antis que no dengún con conciertos dende iste mesmo viernes con un concierto de cinco collas de mosica (Los Inspectores, Despierta McFly, Hotel, Voyeur y Vinos Chueca). Continará mientes o cabo de semana con Hillbilly Mongows y Los Gandules o Sabado y una Jam Session de folk o domingo que menarán Pepín Banzo, La libertina y atros. Mientres as fiestas ista carpa contina apostando por una programación de mosicos 100% aragonesa.

Intepenyas, que dimpués d’a polemica con hostelers y o concello, continará en o parking d’a Expo, con quatre espacios diferents dimpués de cada concierto. Qui bi vaiga podrá esleixir entre a mosica de collas aragonesa, a carpa rock, o “dance club” u as verbenas. Por o scenario principal pasarán beluns d’os artistas más conoixius d’a programación: Fangoria (en un homenache a Corita Viamonte) Marea, Cali y el Dandee, Fyahbwoy, Manowar, LMFAO, Juan Magan, Macaco, Melendi u Tako.

O espacio Z de Val d’Espartera trayerá tamién progamación mosical, encara que remanirá zarrada os diyas 8, 9 y 14. Por astí pasarán artistas como Obús, Saratoga, La pegatina u Rapsusklei, antimás de fer-se-ie festivals de techno u de circo. Atros scenarios mosicals se meterán en Sant Pietro Nolasco, con mosica de “atras culturas”, Sant Bruno que acullirá as artes circenses, a plaza d’o Chusticia con mosica independient y alternativa, a Plaza Santa Cruz, con bandas mosicals u a Plaza d’o Pilar que, antimás d’as tradicionals ixotas bi actuarán Ana Torroja, El Sueño de Morfeo, Conchita, Juan Perro y a Fiesta Máxima Independance y tendrá un segundo scenario t’a mosica folk.

A Gran Vía acullirá ista anyada una feria d’o libro mientres as fiestas. Os más chicotz se’n podrán gronxiar con os chigants y capezutos totz os diyas, antimás de poder ir t’as plazas y parques que tendrán animación endrezada ta ells: Delicias, Los Sitios, Pignatelli, Torreramona u Sant Pablo son beluns d’os puestos a on que se ferán as actividatz más familiars.

Exposicions, tallers, teyatro, cabaret, fiestas d’a biera, concursos, campionatos…. completan a programación fiestera oficial. Tamién como ye cutiano, difuera d’o programa oficial, muitas organizacions y colectivos ciudadans han programau actividatz ta istos diyas, que van fendo conoixer a monico y que s’anunciarán istos diyas.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.