Os policías locals de Puebla d’Alfindén portarán pistolas Taser

O concello d'ista localidat adquirió fa meses dos d'istas armas. Existe controversia pus o suyo emplego ye qüestionau por organizacions pro dreitos humanos y por a mesma ONU

Modelo de pistola Taser X26. Foto: Junglecat (CC-BY-SA 3.0)

Modelo de pistola Taser X26. Foto: Junglecat (CC-BY-SA 3.0)

Os policías locals de Puebla d’Alfindén contarán en breu con pistolas Taser, pistolas d’electrochoque. Será o primer cuerpo policial en Aragón que conta con estas armas calificadas como “no letals“. Os propios policías que van a portar-las ya han pasau un curso especifico ta fer-las servir correctament en caso necesario.

As pistolas Taser disparan uns electrodos que incapacitan a la persona afectada mediant a paralización temporal d’o suyo sistema motor. O voltache recibiu sería sobre 400 voltios con una corrient electrica de 2,1 miliamperios, que ye considerada no periglosa t’a vida. Se fan servir en situacions extremas en que no s’obedeixe a os achents u se menaza d’atacar-los, evitando o emplego d’as armas de fuego u as porras.

Manimenos, dende organismos como Amnistía Internacional u o Comité d’as Nacions Unidas contra a Tortura han criticau o emplego d’iste arma que mesmo la han considerada una traza de tortura. Nomás en Estaus Unius, istas armas matoron entre 2001 y 2008, seguntes un informe d’Amnistía Internacional, a 334 personas.

O Gubierno catalán ya ha autorizau o emplego d’istas armas a os Mossos d’Esquadra y a las policías locals catalanas. Tamién o Gubierno valenciano autorizó o suyo emplego por parte d’as policías locals.

Una rispuesta a Os policías locals de Puebla d’Alfindén portarán pistolas Taser

  1. Pingback: Os policías locals de Puebla d’Alfindén portarán pistolas Taser | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.