Os politicos cuentra la sciencia. Quan as fobias personals niegan a realidat

31 comités locals d'o PAR reclaman que se reconoixca una l'aragonés oriental debant d'o catalán que se charra en l'este d'Aragón

Os politicos cuentra la sciencia. Quan as fobias personals niegan a realidat. Os Comités y Asambleyas d’o Partido Aragonés que demandan que se reconoixca l’aragonés oriental en a Lei de Luengas, asinas como que s’elimine qualsiquier referencia a’l catalán, ya sobrepasan a trentena. Concretament, son 31 los Comités y Asambleyas locals, a os que también s’ha adhibiu lo Comité Comarcal d’o Baixo Aragón, que a semana pasada aprebaba por unanimidat fer parti d’istas reivindicacions. Todas istas asambleyas y comités desichen que en a Lei de Luengas se reconoixca la coexistencia de dos luengas en a comunidat: espanyol y aragonés, y que ista zaguera tien diferents modalidatz agrupadas basicament en dos: aragonés oriental (zona oriental d’a comunidat) y altoaragonés (en a zona norte).

D’a mesma traza, solicitan que s’elimine qualsiquier referencia a la luenga catalana, que se suprima l’Academia Aragonesa d’a Luenga Catalana y, si ye menister, creyar l’Academia d’a Luenga Aragonesa u Academia de Cultura Aragonesa. Lo secretaire d’o PAR d’Altorricón, Amado Forrolla, ha sinyalau que “a unidat d’o partiu en iste tema ye un feito y entre totz debemos aconseguir que a Lei de Luengas reconoixca la nuestra luenga aragonesa, tanto a suya modalidat altoaragonesa como a suya modalidat oriental”. Por a suya parti, lo PAR de Fraga emitiba de recient una nota de prensa en espanyol y en fragatino, un feito que, seguntes Ángel Romero, president d’o Comité local d’o PAR de Fraga, “contrimuestra la voluntat de potenciar a nuestra luenga aragonesa y de que podemos escribir en ella”.

Paralelament, Julián Naval sinyalaba que “o nuestro idioma ye aragonés por os quatro costaus y isto ye un feito que lo avala la historia”. As Asambleyas y Comités Locals d’o PAR que fan parti d’istas reivindicacions son, en a zona oriental d’Aragón,los municipios de: Altorricón, Benabarri, Peralta de Calasanz, Fraga, Vilella de Cinca, A Codonyera, Rafals, Fornols, Beceit, Calaceit y Aiguaviva, asinas como lo Comité Comarcal d’o PAR d’o Baixo Aragón. Os citaus comités y asambleyas informan de que o procés de reivindicación sigue ubierto, por o que, en breus, atras agrupacions d’o PAR realizarán reunions ta sumar-se a istas demandas d’os “aragonesistas”. Cal remerar agora que en istos intes ni a propia Universidat de Zaragoza s’atrive a negar a realidat lingüística de l’Aragón oriental; una mala interpretación de l’aragonesismo, identificando a “lo catalán” como enemigo d’a identidat aragonesa, ye fendo que posicionamientos xenofobos y anticatalans puedan dentrar a fer parti d’a lechislación aragonesa, de man d’una minoría politica que gubierna permanentment sin o refirme electoral.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.