Os premios d’a mosica aragonesa facioron a suya XV edición

Os premios quedan prou repartius. Antón García Abril, Elefantes y as radios libres aragonesas reciben premios especiales.

17 marzo, 2014 | Cultura | Autor: Arredol | Tweet

La Nube actuando en os XV PMA (Foto: Aragón musical)

“Ista gala va por o publico” estió lo lema esleixiu  ta celebrar a XV edición d’os Premios d’a Mosica Aragonesa. Una edición prou especial t’a organización que, china chana, han conseguiu que ista siga una calendata de referencia t’o mundo d’a mosica en Aragón, y que deixó unos premios prou repartius entre totz os candidatos.

A gala, celebrada iste lunes en o Teatro Principal de Zaragoza, prencipió con l’actuación de l’artista flamenco Nacho Estévez “El niño”. Dimpués d’ell, Virginia Martínez tornó a menar una gala por a on que pasoron una buena represetación de mosicos y d’artistas relacionaus con o mundo d’a mosica actual en Aragón.

Antimás de Nacho Estévez, en a gala actuoron Doctor Loncho, Carmen París, Elefantes con Ana Muñoz, y La Nube. O scenario estió testigo d’a tornada de Elefantes, qui levaban ueito anyadas retiraus y heban tornau t’a mosica o pasau 28 de febrer en a sala Oasis. Tamién La Nube tornó t’a mosica, estrenando una nueva canta sobre o scenario d’o Teatro Principal, dimpués de más d’una decada d’inactividat.

A organización entregó tres premios especials. O primer d’ells t’a Federación de radios libres qui facioron un discurso reivindicando o suyo papel en a espardidura d’a mosica y a cultura alternativas y planteyoron bellas reivindicacions. Antón García Abril replegó lo premio ta toda una trachetoria, reconoixendo a carrera d’o compositor d’a banda sonora de “El hombre y la tierra”, u de l’Himno oficial d’Aragón, entre atras muitas obras. O mosico, de ueitanta anyadas, esfendió a calidat y a variedat d’a mosica que se ye fendo en Aragón. Elefantes, antimás de fer l’actuación de conchunta con Ana Muñoz, ganoron o Premio Global d’a mosica, que en anteriors edicions ise ta Loquillo y Aurora Beltrán.

Mientres a gala se prochectoron videos a on que mosicos y atras personas relacionadas con o mundo d’a mosica, recontaban os suyos momentos más importants vinclaus a la mosica aragonesa, a on que se repitioron a soben as referencias ta Mauricio Aznar, Héroes del Silencio u Sergio Algora y El niño gusano. Os organizadors tornoron a convidar a la chent a ninviar os suyos “momentos d’a mosica aragonesa” por Twitter, fendo servir o hashtag #MomentosMusicaAragonesa.

O premio t’a millor canta en luenga autoctona aragonesa teneba estianyo quatre representants de l’aragonés: Gran Carvin, Prau, Inestables y La Vidrieda Irreverente. A la fin os ganadors estioron Inestables por a suya canta O rocarnoll ye asinas. Os dos premios más asperaus, t’a millor colla y o millor cantaire, se los levoron Tachenko y Cuti.

A lista completa de premios y premiaus ye la siguient:

Millor album autoeditau: Círculo de guerra, de Sick Brains.

Mayor refirme: Radio 3.

Millor DJ: Andrés Campo

Millor programación mosical: La lata de bombillas.

Millor video: Bonus extra, de Pecker.

Millor producción: West west, de The Fractal sound.

Millor portalada: Lucifer, de Los Lügers.

Mayor prochección: Ana Muñoz

Millor canta en luenga autoctona aragonesa: O rocanroll ye asinas, de Inestables.

Premio Atras mosicas: Nacho Estévez, “El niño”.

Millor EP: El libro de la vida, de Doctor Loncho.

Millor directo: Pecker.

Millor canta: Postales envenenadas, de Las Novias.

Millor album: Ejazz con jota, de Carmen París.

Millor cantaire: Cuti

Millor colla: Tachenko.