Os presupuestos d’Aragón ta 2013 serán listos a prencipios d’anyo

O consellero de Ficienda ha confirmau que l'equipo de Gubierno treballa en a realización d'un documento que ya tien marcau o teito de gasto. Por tanto, nomás queda decidir a traza de repartir-lo entre os departamentos

Os presupuestos d’Aragón serán disponibles y en funcionamiento a prencipios d’anyo. Ye o mensache que ha ninviau José Luis Saz, consellero de Ficienda d’o Gubierno d’Aragón, que ha preferiu no dentrar en detals ya que, como ha confirmau, as cuentas son a día de hue en “pleno proceso d’elaboración”, o que implica mantener duras conversacions con totz os departamentos afectaus., “O mas prudent ye no dicir-ne brenca”, ha asegurau o consellero antes de compareixer en a Comisión parlamentaria d’o ramo.

Seguntes ha valurau Saz, as cuentas aragonesas no nomás se veyen afectadas por a crisi soque tamién por o teito de gasto que s’ha imposau dende o Gubierno central, una cosa que no ocurriba dica o momento. Por ixo, se tracta d’un proceso d’elaboración embolicau en o que no se debe “discutir quál ye l’importe d’o presupuesto” soque mas bien determinar “cómo se distribuye ixe teito de gasto”. “Feremos un poder ta cumplir os plazos, pero quedan dos u tres detals que zarrar”, ha asegurau a os meyos de comunicación.

Financiación autonomica

Antes de confirmar que Aragón se seguirá financiando por metodos ordinarios -ye dicir: que no se recurrirá a o rescate-, Saz ha tornau a deixar clara a suya disconformidat con un modelo de financiación que, ha recordau, no contó en o suyo momento con o refirme d’o PP. “Diciemos que yera un mal sistema y dimpués de dos anyos s’ha visto que yera un mal sistema”, ha adhibiu asperando que diga que o PP “teneba razon”.

“Si i hai estudeos ta modificar o sistema de financiación, seremos veixilants”, ha confirmau de vez que ha recordau que o modelo de financiación no ye qualcosa sin importancia ya que se tracta d’una “estructura potent” que practicament chestiona a mesma cantidat d’o gasto publico d’o Estau. Ta Saz, “o modelo ha de servir a os intreses comuns d’as comunidatz autonomas”, motivo por o qual ha advogau por no cambiar-lo “cada dos, tres u quatro anyos”.

Fuent: http://www.aragon2.com/n-20259-503-presupuestos_Aragon_para_2013_estaran_listos_principios

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.