Os pueblos indichenas d’Archentina, en movilización indefinida por a restitución d’as suyas tierras

A Cumbre de Pueblos reclama a Cristina Fernández una trobada pa conoixer as reivindicacions d'os pueblos orichinarios. Mientras a reunión no se faiga, os indichenas se movilizarán semanalment

indigenas-anred

Foto: ANRed

Os pueblos autoctonos d’Archentina reunius baixo o bateauguas d’a Cumbre Nacional de Pueblos y Organizacions Indichenas son realizando una movilización dende o prencipio de chunio pa reivindicar a restitución d’as suyas tierras ancestrals. As protestas, explica o diario archentino Clarín, tamién piden milloras sanitarias entre as comunidatz autoctonas y a fin d’os “desaloixos d’os territorios, persecucions, chudicialización y muertos de luitadors” indichenas.

A ronda de movilizacions se decidió a primers d’iste mes en una trobada de representants de pueblos indichenas en a provincia de Formosa, en o norte d’Archentina. As protestas son convocadas en tot o país, pero mas que mas en a plaza de Mayo, en Buenos Aires, cada mierques. L’obchectivo d’os representants indichenas ye que los reciba o gubierno que encabeza Cristina Fernández. Si o 3 de chulio no i hai respuesta, podrían decidir de realizar movilizacions mas intensas.

Entre os pueblos representaus en a movilización se troban os orichinarios de Formosa, d’a on rancó a protesta (qom, pilagá, wichi y nivaklé), y tamién atros asentaus en a resta d’o territorio archentino, como os mbya guaranís, os mapuches u os kolles, por citar belun d’os mas numerosos. A territorialidat ye un d’os aspectos mas destacaus d’a luita d’istes pueblos. A reunión de Formosa sirvió pa destacar a oposición d’istes pueblos a la industria extractiva dentro d’os suyos territorios ancestrals y pa reivindicar-ne a suya propiedat. Significativament, un d’os lemas que encabezoron a trobada estió “a tierra robada será recuperada”.

Un d’os refirmes que han aconseguiu sumar os indichenas en ista movilización ha estau o d’o premio Nobel d’a Paz Adolfo Pérez Esquivel, qui ha recordau que “os dreitos humanos son tamién dreitos d’os pueblos, y han d’estar respectaus“. Pérez Esquivel ha reclamau a Fernández que conceda una audiencia con os representants indichenas y que recuerde que gubierna “t’os 40 millons d’archentinos”, incluius aquells que son miembros de pueblos orichinarios.

Fuent: http://www.nationalia.cat/ca/noticies/1495

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.