Os secretos d’a indumentaria tradicional aragonesa en o Museu de Zaragoza

O museu organiza un curso ta explicar l'orichen y a evolución de l'antiga indumentaria aragonesa

Maniquí con trache tradicional (Foto: D.Ch.A.)

Maniquí con trache tradicional (Foto: D.Ch.A.)

O Museu de Zaragoza ha organizau un curso de indumentaria tradicional aragonesa que preba de fer conoixer como vestiban os nuestros debantpasaus, de traza rigurosa de vez que didactica, con l’obchetivo de continar treballando t’amanar o patrimonio etnolochico aragonés t’os ciudadans.

Mientres quatre chornadas que prencipioron o pasau 9 de noviembre y continarán dica o 30 os participants aprenden como yera o vestir tanto externo como interno y como fue evolucionando a traviés d’o tiempo. Tamién se i aprenderá sobre pentinaus, tocaus, alfayas u calcero.

O curso, clamau ‘Indumentaria tradicional. Orichen, evolución y pervivencia a traviés d’as coleccions d’o Museu de Zaragoza’ se desembolica en horarios de 18:00 a 20:00 os diyas 16, 23 y 30 de noviembre.

O Museu de Zaragoza conta antimás con una Sección d’Etnolochía en a Casa Pirinenca d’o Parque Gran – José Antonio Labordeta. Astí se pueden viyer piezas de indumentaria, ferramientas y trastes, en una exposición que recreya ambients domesticos d’o Pirineu aragonés.

Antimás, aintro de l’esvielle de fundos de indumentaria etnolochica, s’ha ficau un extraordinario conchunto de finals d’o sieglo XIX y prencipio d’o XX, formau por una parella d’o Semontano teruelano. Bi ha tamién una replega de documentos graficos con más de 500 imachens sobre indumentaria aragones d’os sieglos XIX-XX que se pueden viyer en a planta baixa d’o museu. En a segunda planta s’ufren una serie de programa audiovisuals con afers etnograficos: casa, mundo rural, artesanía textil, virolla, indumentarias, etc…

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.