Os separatistas ucrainianos entregan as caixas negras de l’avión abatiu a representants malaisios

Os rebeldes d'as republicas populars de l'este d'Ucraína niegan estar embrecaus en a trachedia

Memorial a os muertos en l'avión en Amsterdam. Foto: Roman Boed (CC-BY)

Memorial a os muertos en l’avión en Amsterdam. Foto: Roman Boed (CC-BY)

Os rebeldes prorrusos entregoron ahiere a representants malaisios as dos caixas negras d’o Boeing-777 siniestrau ta l’este d’Ucraína con quasi 300 personas a bordo.

“No hemos veniu aquí ta fer a fama a dengún. Todas dos caixas son propiedat de Malaisia. A simpla vista se puede apreciar que as caixas son intactas“, aseguró a la prensa o chefe d’a delegación d’o país asiatico, un coronel d’o Consello de Seguranza Nacional de Malaisia.

O primer ministro d’a Republica Popular de Donetsk, Alexandr Borodái, fació entrega de totz dos dispositivos aerios entre una ceremonia oficial celebrada en a siede d’o Gubierno separatista en Donetsk en que as partes sinyoron qualques documentos oficials.

As caixas de color narancha estioron mesas sobre a mesa d’a sala de conferencias y entregadas a la parte malaisia entre os numerosos flashes d’os fotografos.

“Flight recorder. Do not open” (Gravador de vuelo. No ubrir), se podeba leyer en as caixas.

“Agora, tenemos tres quefers: a repatriación d’os cuerpos, o treslau d’as caixas negras y a devolución d’os obchectos personals a os suyos duenyos“, dició o representant malaisio.

O coronel explicó que, una vez que ya tiene as caixas negras en o suyo poder, o tren con os 282 calavres y 87 fragmentos d’os pasachers y tripulants de l’aparato podrá abandonar a estación de Donetsk con destín t’a ciudat de Járkov t’o suyo examen y identificación.

“Nos bi iremos agora mesmo”, dició o militar malaisio, qui viachará en o mesmo tren que transporta os vagons frigorificos con os calavres.

Por a suya parte, Borodái se manifestó convenciu que “l’analís d’as caixas negras ferá luz sobre cómo ocurrió realment iste terrible desenfín“.

“As quasi 300 personas fallecidas son victimas d’una guerra no declarada por as autoridatz de Kiev contra o pueblo d’as republicas populars de Donetsk y Lugansk“, denunció.

Borodái aseguró que “a parte ucrainiana no ye intresada en a investigación obchectiva d’o siniestro con a participación d’expiertos internacionals y en que a verdat salga“.

Y negó que as milicias insurchents hesen abatiu l’avión de Malaysian Airlines como aseguran Estaus Unius y cancillerías occidentals arrienda.

No disposamos d’a tecnolochía necesaria y, o mas important, no’n tenebanos de garra motivo, ya que no quitamos garra esquimen con ista trachedia humana”, resaltó.

Amás, anunció una declaración unilateral d’alto o fuego en un radio de 10 kilometros arredol d’a estrafalla, que ocurrió en un campo d’a localidat de Grabovo, ta facilitar a labor d’os expiertos internacionals.

En Járkov o tren con os calavres será recibiu por una trentena d’expiertos, en a suya mayoría d’Holanda, país d’o procedeban 193 victimas, y Malaisia, nación propietaria d’o Boeing-777 accidentau.

Seguidament, se procederá a o suyo examen, dimpués d’o que serán repatriaus, encara que ye posible que qualques familiars pueda viachar ta Járkov ta identificar-los personalment.

Fuent: http://www.eldiario.es/politica/Rebeldes-entregan-Boeing-777-representantes-malasios_0_284171586.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.