Os serbios d’o norte de Kosovo fan un referendum sobre a independencia

Bi participan quatre municipios O feito tornar a fer puyar a tensión y a fer más dificil a candidatura de Serbia en a UE.

Mapa Kosovo (Foto: Biquipedia)
Mapa Kosovo (Foto: Biquipedia)

Os habitadors d’os quatre municipios de mayoría serbia d’o norte de Kosovo (Severna Kosovska Mitrovica, Zvecen, Zubin Potok y Leposavic), difuera d’o control de Pristina dende a proclamación de Kosovo como estau independient o 2008 decidirán, entre o martes y o miercols, en un referendum no vinculant si acceptan l’autoridat d’as institucions kosovars a o norte d’o rio Ibar, que desepara as comunidatz en pleitos. Os convocants d’o referendum quieren contrimostrar a oposición d’iste territorio tanto a la independencia de Kosovo como a o gubierno de Pristina.

Seguntes Serbia, que verbalment no les refirma, o feito puet meter mesmo más entrepuces que siga un país candidato de pleno dreito ta dentrar en a UE. Bruselas ha de decidir, no más tardi de marzo, si la accepta como candidata y no, encara que en aviento ya le dició que no chusto por a violencia en a rechión. Manimenos os responsables politicos serbios de Kosovo no han feito caso d’a petición d’o minitro de Kosovë i Metohija, Goran Bogdanović, que les demandó en nombre de Serbia que no tirasen enta debant con o referendum.

Seguntes Kosovo y la misión d’a OTAN sobre o terreno, a consulta puet fer esclatar una nueva ola de violencia como la de l’estiu pasau. Dende chulio, a presencia de funcionarios albaneses en os pasos d’as mugas con Serbia ha feito más grau a tensión, de traza que ya bi ha habiu bellas pocas pleitinas entre as dos comunidatz en litichio y con as fuerzas d’interposición espardidas por ixa redolada.

Tampoco no lo veyen con buenos uellos a resta de puestos de mayoría serbia en o centro y o sur de Kosovo.

O portavoz d’a Misión de l’Administración Provisional d’as Nacions Unidas de Kosovo (UNMIK), Olivier Salgado, dició o lunes que o referendum en o norte d’o país se feba contra la lei y que, alavez, no teneba valura legal.

A votación se fa o martes y o miercols en uitanta y dos colechios electorals de Severna Kosovska Mitrovica, Zvecan i Zubin Potok, y o miercols en Leposavic a on que ye o unico alcalde d’a rechión que ye d’o Partiu Democratico de Serbia, o partiu que agora mesmo gubierna Belgrado. Os resultaus finitivos no se sabrán dica o 19.

 

Fuent: http://www.vilaweb.cat/noticia/3983858/20120214/serbis-nord-kosove-fan-referendum-independencia.html

2 Rispuestas a Os serbios d’o norte de Kosovo fan un referendum sobre a independencia

  1. Yera platero que habia de pasar isto. Ye como si os yankis mos furtasen Sant Chuan de la Penya (territorio an naixio o reyno d’Aragon). Ta os serbios, Kosovo ye a tierra an naixio o suyo pueblo. Ye normal que agora os serbios quieran tornar pues si Serbia dentra en a UE ya no podran fer-lo y tiendran os mesmos problemas con a reunificación que Moldavia con Rumania, por eixemplo. En os balcans, y en tot l’Este, no se puet simplificar ya que a mezcla de nacionalidatz que bi’n-ha en os paises post-45 estara un problema ta Europa la resta de la suya vida.

  2. @gerardoensuisse

    O problema Kosovar ye responsabilidat de la OTAN, d’a suya chestión imperialista y como van intervenir en a rechion balcanica invadindo a soberania d’os pueblos. El Pifostio que han creyau ye de categoria.
    Kosovo i Metohija a prencipie de lo sieglo XX yera etnicament serbio con una proporcion de 90 a 10 en poblacion ortodoxa a musulmana. Mal que bien conviviban, debiu a un feito purament demografico (os albaneses gosaban tener 9 u 10 fillos por parella, mientres que os serbios en teneban 1 u 2) a proporción s’equiparó.
    En o follón d’as guerras balcanicas d’os 90 y con un barrenau ultranacionalista y chenocida como president de Serbia, a OTAN en cuentas de tratar d’empentar lo camin enta una democracia en Serbia, va a castigar aniquilando y bombardiando a la poblacion civil serbia, y aprofitando ta meter-se de parti d’atros chenocidas ultranacionalistas como yeran os d’a UCK pro-albanesa. A los serbios de Kosovo los van forachitar a cuasi totz y en cuentas de denunciar ixe atentau contra os dreitos humans por parti d’os Albaneses-Kosovares a mayor parti d’a comunidat internacional apoyó l’independencia d’ixe nuevo Kosovo…an os suyos mainates y mesmo o president son bien conoxius por as suyas “tropelias” por a interpol. (dicen que o president de kosovo ye sospitoso de traficar con organos humans)… ixe ye l’estau independient apoyau por EEUU, Alemania,etc…

    Os serbios prou que no son santos, pero a independencia d’o nuevo estau de kosovo ye alacetada en crimens, y criminals e ixo no ye garra buen empiece ta cosa… Ye inaceptable que a UE desixa a Serbia como condición ta integrar-se a reconoxedura d’un estau que ocupa territorio historico serbio y que haiga forachitau a buena parti d’a suya población a guetos en os suburbios de Belgrado u a l’emigracion por europa.

    O feito esferencial d’o nuevo Kosovo ye esclatero huei y en bels anyos sera inevitable mesmo que Espanya reconoixca a suya independencia, pero l’empiece no ha podiu estar pior…

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.