Os sindicatos combativos achuntan más de 15.000 presonas en Zaragoza

CNT, CGT, SOA, CATA y Intersindical fación un clamamiento ta continar en a luita contra la reforma dillá d'a vada cheneral en Aragón d'ahiere

30 marzo, 2012 | #Vada29M | Autor: Arredol | Tweet

Anviesta d'a Plaza d'o Pilar de Zaragoza

Arredol de 15.000 presonas marchoron ahiere por as carreras de Zaragoza ta rematar a chornada de luita y vada cheneral convocada por os sindicatos CNT, CGT, SOA, Cata y Intersindical. A cita yera en o vico de Sant Chusé enta la Plaza d’o Pilar, pasando por Plaza Sant Miguel, o Coso y a carrera Don Chaime. As milentas de presonas que secundoron a marcha s’estendillaron quasi por a mitat d’o recorriu, y quan a capeza d’a marcha dentraba en a plaza d’o Pilar, encara quedaba chent en a Plaza Sant Miguel, por eixemplo.

Dimpués d’una chornada de luita y piquetes en a carrera os sindicatos aconsiguioron aplegar muitisma chent, desbordando as previsions y seguntes os convocants “contrimostrando que atro sindicalismo ye lo que s’amenista”. En o recorriu tamién s’achuntoron as plataformas d’estudiants, o 15-M y a Marea Verda d’educación, asinas como colectivos saharauis, senegaleses u latinoamericans. A marcha, sin incidents, estió vichilada por unidatz d’os antidisturbios d’a policia espanyola que no habioron de intervenir en garra inte.

Ya en plaza, que s’emplió dica la meitat, os convocants aproveitoron ta leyer os manifiestos, agradixer a presencia d’os más de 15000 manifestants y fer un clamamiento a continar a luita t’aturar as retalladas y rebaixadas contra as triballadoras y triballadors d’Aragón y aturar a reforma laboral a traviés d’a movilización. Tamién i charró un d’os detenius mientres o diya, que agradixió o refirme, especialment, quan yeran detenius en dependencias policials. Asinas mesmo un miembro d’a plataforma d’estudiants CEPA fació una crida a favor d’a escuela publica y por a movilización estudiantil. Dende Colombia, un manifestant tamién remeró a os sindicalistas acotolaus cada anyo en o suyo país, más de 5000, y clamó ta la unidat d’os triballadors sin distincions de mugas.

A manifestación, dimpués d’un diya intenso de presencia en a carrera d’os sindicatos clamaus minoritarios, remató pacificament con a ment puesta en nuevas movilizacions t’aconseguir aturar a enrestida d’os gubiernos contra os ciudadans y os triballadors y triballadoras.