Os sindicatos de SARGA demandan dos anyadas sin EREs ni rebaixas d’as condicions laborals

A negociación contina a pocos diyas de que remate o plazo fixau ta l'ERE

Consello d'Administración de SARGA (Foto: D.Ch.A.)

Consello d’Administración de SARGA (Foto: D.Ch.A.)

A reunión entre representants d’os treballadors y d’a interpresa SARGA (Sociedat Aragonesa de Chestión Agroambiental) d’iste chueves remató con as posturas más amanadas pero encara sin plegar en garra alcuerdo. As dos partis tienen dica o 31 d’iste mes ta plegar-ie. En caso de que no bi hese un pacto laboral se presentaría o temiu ERE.

De man d’a interpresa, se contina ufrindo indemnizacions de 30 diyas por anyada treballada t’a chent que se forachitase y 40 t’as baixas incentivadas. Os despidos serían de 75 personas. Dotze d’ells podrían estar d’entre os albeitars. Tamién se presentoron as cuentas de 2012, a on que bi habió perdas por más de 450.000 euros.

Os representants d’a plantilla facioron a suya propuesta finitiva y menazoron con movilizacions en caso de no plegar en alcuerdos. A propuesta puyaría dos diyas más por anyada treballada en qualsiquier d’os casos y un plan de recolocación t’os forachitaus. Antimás creyen que os despidos habrían de basar-se en “l’antiguidat, a formación, a experiencia profesional en o cargo y as cargas familiars”.

Os treballadors quieren una mica de tranquilidat dimpués de tantas rumors, escandalos y a menaza d’un ERE contina en os zaguers tiempos. Una d’as demandas que se facioron en a zgauer reunión va en ixa endrecera, demandando un pacto d’estabilidat, a on que, mientres dos anyadas no se baixe garra chornal ni se cambeen as condicions laborals d’os treballadors ni se faiga garra ERE. Os sindicatos han considerau ista zaguer mida como “intocable”.

Tant y mientres a polemica por o funcionamiento de SARGA contina. Más que más, por a chestión que una d’as dos interpresas que se fusionoron ta creyar-la, Sodemasa, y os “foscos vinclos” con o Partiu Aragonés (PAR) que publican bellas informacions de El Periodico de Aragón. Chunta Aragonesista (CHA) ya demandó en as Cortes una investigación que aclarise as debanditas informacions. A zaguer d’ellas, vincla tamién a Pedro Oliván, representant de OSTA, un d’os sindicatos con más representación en SARGA, con o PAR, qui han confirmau que o sindicalista fa “fainas informaticas en a suya siede”. O sindicato se amostró a-saber-lo carranyau con El Periodico y, d’atra man y debant d’a dubda, ha demandau en un comunicau a dimisión y baixa de Pedro Oliván.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.