Os soldaus britanicos d’o ‘Bloody Sunday’ pueden estar arrestaus y encausaus por asesinato

Os soldaus britanicos que participoron en a masacre d'o "Bloody Sunday" podrían estar detenius y procesaus por os feitos en que morioron catorce civils desarmaus

Memorial a os asasinaus por l'Exercito britanico en o "Bloody Sunday". Foto: Zubro (CC-BY-SA)

Memorial a os asasinaus por l’Exercito britanico en o “Bloody Sunday”. Foto: Zubro (CC-BY-SA)

Os soldaus britanicos que matoron a catorce manifestants en o clamau ‘Bloody Sunday‘ en Derry, en o Norte d’Irlanda, o 30 de chinero de 1972, pueden estar arrestaus y acusaus d’asesinato u d’intento d’asesinato. Seguntes publica o Sunday Times de Londres, una vintena de soldaus, ya chubilaus, podrían estar interrogaus sobre o tiroteu de fa mas de quaranta anyos y, finalment, procesaus.

O ministerio de Defensa d’o Reino Uniu ya ha empecipiau a contractar advogaus pa representar a os soldaus, que serán interrogaus sobre o papel que tenioron en o tiroteu, en que s’ensanyoron con os participants d’una marcha de dreitos civils.

Agora fa tres anyos que se fació publico l’informe Saville, que contiene os resultaus y conclusions d’a investigación dirichida por o exchuez de l’Alto Tribunal, Lord Saville, y que trahió a o gubierno britanico a pedir perdón en nombre d’a nación.

L’informe Saville concluyó que totz os muertos iban desarmaus y que heban estau asasinaus d’una traza ‘inchustificada y inchustificable’. Seguntes o documento, l’exercito perdió o control d’a situación y qualques soldaus mintioron pa enguiliar a culpabilidat.

The Sunday Times informa que una fuent proxima a la policía, que ha visto os fichers d’o gubierno, ha confirmau a posibilidat que luego s’ordine una acción chudicial contra os soldaus. A mesma fuent diz: ‘Isto ye o prencipio. Será a primer vegada que soldaus son interrogaus por a policía como parte d’una investigación d’asesinato, cosa que fa pensar que beluns serán procesaus.’

Interrogatorios imminents

Tot y que, seguntes a primera fuent, os interrogatorios podrían estar imminents, un portavoz d’a policía d’Irlanda d’o Norte diz que os plazos se pueden prolargar. ‘Os quefers preliminars ya han empecipiau, pero será una investigación larga y compleixa –diz–. Pa que a investigación sía quanto mas completa y eficaz millor, a policía amenista os testigos que declaroron en l’informe Saville, porque a policía no ye autorizada a fer servir a Saville como testigo en una investigación criminal.’

Seguntes o dictamen, no totz os soldaus batioron a os manifestants. N’estioron dos, identificaus como ‘chefe F’ y ‘soldau G’, que disparoron y asasinoron a la mayoría de civils. Entre ells dos matoron entre ueito y diez manifestants. L’informe tamién asegura que continan vivos, pero no s’han feito publicos os nombres pa privar represalias.

Fuent: http://www.vilaweb.cat/noticia/4150982/20131020/soldats-britanics-bloody-sunday-poden-arrestats-encausats-assassinat.html

Una rispuesta a Os soldaus britanicos d’o ‘Bloody Sunday’ pueden estar arrestaus y encausaus por asesinato

  1. Pingback: Os soldaus britanicos d’o ‘Bloody Sunday’ pueden estar arrestaus y encausaus por asesinato | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.