Os tambors y bombos ya suenan en o Baixo Aragón

Os actos culturals u relichiosos continan mientres tot lo cabo de semana.

Bells andorranos dimpués d'a Rompida

Bells andorranos dimpués d’a Rompida

Albalat de l’Arcebispe, Alcorisa, Andorra, Ixar, La Puebla d’Ixar,Sant Per de Calanda y Urreya de Gayén facioron en a meya nueit d’o chueves a suya tradicional “rompida” a on que o silencio se torna un furo estrapalucio en plegar as dotze d’a nueit. Calanda lo ha feito iste viernes de meyodiyas con a firme presencia de turistas y visitants. Alcanyiz ye l’unico lugar d’a Ruta d’o Tambor y o Bombo que no tien ista tradición, encara que por as suyas carreras ya se pueden sentir os toques que se prolargarán dica o sabado.

En a más gran parti d’os lugars l’alcalde u alcaldesa ye estau l’encargau de presidir os actos centrals. En Calanda han contau con a presencia de Fernando Trueba, cineasta y ganador d’un premio Oscar, y en La puebla Mariano Estrada, mayestro y poeta d’o lugar presidió, chunto a l’alcalde, a rompida. Encara que mientres istos diyas no deixa d’espurniar,  a plevia fineta no ha privau de fer a más gran parti d’actos, encara que bella procesión s’ha habiu de suspender.

En total son nueu os lugars que fan parti d’a Ruta d’o Tambor y o Bombo, en tres comarcas – Baixo Martín, Andorra – Sierra d’Arcos y Baixo Aragón – d’o Baixo Aragón historico. Continan asinas os actos d’a Semana Santa baixoaragonesa, fiesta declarada d’intrés turístico que todas las anyadas imple a ufierta hostelera d’a redolada. Mientres quatre diyas bi habrá procesions y actos relichiosos u culturals en istos nueu lugars a on que os tambors y os bombos tienen un puesto especial y protagonista.

O estrapalucio d’as percusions remata o sabado con diferents actos en cada lugar encara que os actos relichiosos u culturals continan tamién o domingo. O lunes muitos baixoaragoneses celebrarán tamién a “Pascuica” a on que marcharán t’os mases a pasar un diya tastando a gastronomía d’a redolada en companyía de parentalla y amigos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.