Os treballadors d’as contratas se movilizan debant de l’aprebación d’o presupuesto municipal de Zaragoza

O lunes se reunioron os comités d'interpresa d'as contratas que levan os servicios municipals d'o Concello de Zaragoza

Concentración debant d'o concello (Foto: CGT)

Concentración debant d’o concello (Foto: CGT)

Os treballadors d’as principals contratas municipals de Zaragoza han anunciau movilizacions en conoixer-se que s’aprebarán os presupuestos d’o Concello ta 2013.

Seguntes o portavoz d’a Coordinadera de treballadors d’istas interpresas, Javier Anadón, “As retalladas presupuestarias d’o Concello, tanto en transporte urbano de viachers, como en escosque de carreras, replega de vasuera y escosque y mantenimiento de parques y chardins han significau que se han achiquiu os meyos ta fer ixe servicio, por lo que refusamos istas retalladas que afectan de traza negativa a las condiciones de treballo d’os treballadors, y a la perda de calidat d’o servicio que agora se ye dando a lo ciudadan”.

Iste lunes se reunioron os comités d’interpresa de TUZSA, FCC escosque publico, FCC parques y chardins, Umbel, Ferroset, LIMASA, EULEM, Prides, Acuagest y TRAZGO ta alcordar un calendario de movilizacions que prencipiará o venient 5 de marzo con una campanya informativa en o recinto d’a Cincomarzada. Dimpués, o 7 de marzo, a las 19:00 se ferá una concentración en a Plaza Espanya. O 14 de marzo a la mesma hora se ha convocau una manifestación dende a Plaza Aragón dica la Plaza d’o Pilar. No se descarta fer aturadas de conchunta en as interpresas afectadas.

Seguntes Anadón, “esfenderemos coste lo que coste, que se mantienga a calidat d’o servicio a lo ciudadan“, por lo que “no imos a permitir que as retalladas que o Concello y as diferents interpresas haigan pactau, y se incluyan en os presupuestos municipals de 2013, sirvan ta retallar dreitos ya conseguius, sigan laborals, socials u economicos”.

Por ixo, os treballadors d’as contratas municipals han feito un clamamiento a las collas municipals en o sentiu de que “a la hora de fer os presupuestos municipals, han de guaranciar a calidat d’o servicio y os puestos y condicions de treballo de qui damos iste servicio”.

 

Fuent: http://www.cronicadearagon.es/wordpress/?p=38213

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.