Os treballadors d’AUZSA exichen que as horas extraordinarias se transformen en puestos de treballo

A interpresa concesionaria d'o transporte publico en Zaragoza realizó en chinero 3.777 horas extras, o que equivale a 22 puestos de treballo

Foto: ffuentes (CC-BY)

Foto: ffuentes (CC-BY)

A sección sindical d’Intersindical d’Aragón/Colectivo Unitario de Treballadors en Autobuses Urbanos de Zaragoza (AUZSA), ha denunciau que en ista interpresa s’han realizau 3.777 horas extras en o mes de chinero, ta poder amprar o servicio compromeso, o que en opinión d’ista fuerza sindical contrimuestra que “a plantilla actual de 1.099 treballadors ye insuficient“.

Istas 3.777 horas extras suposan 22 nuevos puestos de treballo que, seguntes o pareixer d’IA-CUT, “AUZSA habría d’achustar decamín d’a bolsa d’emplego de l’ERE que han de reingresar en a interpresa antes de finalizar 2015″, tal como se pactó entre representants d’os treballadors, AUZSA y o Concello.

O sindicato mayoritario en a interpresa aspera que o Concello de Zaragoza, sobre a base d’ixe alcuerdo, inste a AUZSA a que “cese a practica de realizar horas extras, creye emplego, accelerando a contractación de nuevos treballadors, sin asperar a que finalice 2015 ta achustar a os 50 treballadors que falta de reingresar d’os 125 forachitaus”.

IA-CUT afirma que a falta de treballadors se deixa sentir tamién en as oficinas, ya que iste sindicato s’ha visto obligau a interponer denuncia debant d’a Inspección de Treballo por no aportar a interpresa a documentación trimestral que ye obligada a entregar por Lei, concretament, kilometros realizaus y viachers transportaus.

IA-CUT ha sinyalau que existe una insuficiencia de kilometros en o ret, en función d’a demanda existent. “Os usuarios nos siguen demandando que linias como a 23 y a 40 recuperen recorrius por l’Actur, u por Fernando o Catolico dica o Seminario como ent’a linia 40”, diz o sindicato.

Tamién ye insuficient, a o suyo chuicio, o tiempo de recorriu y con ixo l’incumplimiento reiterau d’as freqüencias y aumento d’os recorrius “de vuedo” (sin amprar servicio, ni portar viachers) en a mayoría d’as linias, en especial a 22, 32, 42, 33, 35 y 44 y o servicio bubón N4, a o que se le ha ixamplau o recorriu, y se le mantiene o mesmo tiempo ta realizar-lo. “Respective a os sabados y festivos, en quasi todas as linias o tiempo ye de raso insuficient y por un regular no se cumplen as freqüencias”, diz o sindicato.

Solidaridat con FCC

Finalment IA-CUT en AUZSA, ha manifestau o suyo emparo y solidaridat con os treballadors de FCC Parques y Chardins, “en a suya chusta luita por a recuperación d’os dreitos laborals, socials y economicos que les han estau sacaus sobre a base d’una reforma laboral a todas luces inchusta que permite incumplimientos unilaterals de convenios quan han estau sinyaus por dos partes”.

Fuent: http://www.cronicadearagon.es/wordpress/?p=48286

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.