Os treballadors d’os autobuses de Zaragoza se movilizan contra os retalles de plantilla y servicios

Amuestran gran refús por as parolas de Belloch clamando-les insolidarios.

Foto: ffuentes (CC-BY)

Foto: ffuentes (CC-BY)

Contina en Zaragoza a polemica por as zaguers midas presas por a interpresa encargada d’o transporte urbano en autobús AUZSA, que incluyen forachitar a 153 treballadors d’a mesma. Ahiere o Comité d’Interpresa se reunión, prenendo bells alcuerdos y convocando a quantas movilizacions que s’habrán de confirmar o chueves en una asambleya.

En primeras, o comité d’interpresa querió remerar o suyo refús t’as parolas de l’alcalde Juan Alberto Belloch, qui tractó d’insolidarios a los treballadors de AUZSA. Os treballadors se sienten “victimas d’as decisions municipals en haber retallau o servicio d’autobús” y remeran  que a interpresa, refirmando-se en ixa mida, “ha feito fuera a 153 trebaladors”.

O comité ha quiesto remerar a la población zaragozana que “no son funcionarios sino treballadors d’una interpresa privada que ha conseguiu en l’anyada anterior más de 12 millons d’euros d’esquilmen” y creyen que “o problema se solucionaría refendo o servicio d’autobús que s’ha retallau”. Tamién han quiesto quedar ubiertos t’a negociación y demandan a l’alcalde Belloch una reunión a tres, entre o comité d’interpresa, a propia interpresa y o concello, ta charrar sobre o conflicto laboral y o servicio de movilidat.

Tanimientres, han aprebau bellas midas que s’habrán de confirmar en os venients diyas. Entre ellas bi son aturadas parcials indefinidas que prencipiarían o 23 de setiembre, concentracions, replegas de firmas, caravanas d’autos y una manifestación convocada t’o diya 19.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.