Os treballadors d’os grans almacens protestan contra o nuevo convenio

No se descarta a convocatoria de vada.

Concentración o 1 de febrero (Foto: UGT)

Concentración o 1 de febrero (Foto: UGT)

Iste domingo bell ciento de treballadors de grans almacens y superficies comercials s’han concentrau en o Paraninfo zaragozano ta protestar contra o nuevo convenio d’o sector. Ye a segunda convocatoria que fan dimpués d’a que se fació o 1 de febrero. Bellas 5.000 personas treballan en tot Aragón en ista demba y se calcula que, dende que prencipió a crisi, entre 2.000 y 3.000 personas han estau forachitadas.

O nuevo convenio estió sinyau entre os representants d’a patronal y os sindicatos Fasga y Fetico, dos organizacions a qui a resta de sindicatos califican de “amariellos” y de servir a os intreses d’as interpresas y no pas d’os treballadors. UGT, CCOO y OSTA estioron os convocants d’ista concentración. No descartoron convocar una vada en o sector, encara que antis ferán referendums en bellas interpresas ta conoixer bien a opinión d’as plantillas.

O convenio conchela os chornals, que por un regular son d’arredol de 800 euros, mientres quatre anyadas. Antimás istos son vinclaus a las ventas, asinas que podrían baixar-se dica un 5% más. A chornada laboral puyaría dica las 1798 horas anyals y tot lo mundo sería obligau a treballar os domingos y festivos por o mesmo pre. Todas istas midas y atras, fan pensar a bells sindicatos que o convenio podría estar mesmo inconsticucional.

En bells quince u vinte diyas, se conoixerán as nuevas midas que prenerán os sindicatos que son en contra d’iste convenio d’un sector que ye viyendo como se forachita a muita chent. Bellas 3.000 personas podrían haber perdiu o suyo treballo dende o prencipio d’a crisi. Cifra que no se conoix exactament porque, seguntes denuncian fuents sindicals, “se producen muitos despidos d’amagatons”.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.