Os treballadors socials de Zaragoza no aduben con a demanda

Denuncian que no existe planificación a meyo plazo y a manca de recursos ta poder atender todas as demandas. O numer de situacions de emerchencia s’ha duplicau en nomás una anyada en Zaragoza.

Os treballadors d’os Servicios Socials dependients d’o Concello de Zaragoza aseguran no adubir debant d’a gran demanda d’atención de man d’os vecins d’a ciudat. Seguntes ha dito o portavoz, Jesús Domínguez, o numer de personas que demandan una atención d’urchencia s’ha multiplicau por dos en a zaguer anyada. “Y no adubimos; no bi ha prous recursos ta atender a tanta chent”.

Seguntes os profesionals, o problema ye a manca de planifiación de man d’o Concello en a demba de l’asistencia. Denuncian que se ye aplicando una politica “reactiva”, que se modifica seguntes as demandas de cada inte. Y más en istos intes, “quan tenemos un autentico tsunami” en Servicios Socials, seguntes Sara Coloma, tamién treballadora.

En istos intes, y dau o volumen de peticions, se rezaga a respuesta mesmo cinco meses, estando-ne en más d’una ocasión urchent y que pertoca a la manca de vivienda u virolla. Una chestión que habría d’apanyar-se en, maximo, un mes. Un problema que dicen estar por haber-ie masiada burocracia y a lo richido d’o sistema que no les deixa achustar as aduyas a cada caso.

Plan de choque

 “Creyemos que a situación de crisi fa que calga contar con más chent y no retallar gastos”, ha insistiu la tamién treballadora social Yolanda Mañas. Por ixo, planteyan un plan de choque que permita a intervención rapeda y contina en cadagún d’os casos, asinas como recuperar totz os plans t’a creyación de collas de autorefirme.

En a opinión suya, cal fer treballar de conchunta a los vicos de traza que sigan os propios vecins qui s’aduyen entre ells. Ta ixo, han meso d’eixemplo casos d’A Madalena u san Pablo, a on as mullers esqueferadas conseguiban formación en atención domicilaria atendendo a vecins sin parentalla. “Asinas bi ha dos colectivos que consiguen lo que les cal, qui son mirando treballo y qui son mirando companya”, diz.

Por agora s’han achuntau con diferents partius politicos ta explicar-les a situación d’o sector, encara que en as venients semanas han anunciau más proposas ta desichir un modelo social más adaptau a los tiempos d’agora.

Fuent: Aragon2.com

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.