Os vecins de Nuez d’Ebro desobedeixen as imposicions de Fomento

O ministerio de Fomento espanyol zarra l'acceso ta N-II enta Zaragoza en Nuez d'Ebro sin previo aviso. Os vecins d'o lugar se rebelan contra a mida

Dimpués d’una multitudinaria asamblea celebrada en a tarde d’o chueves, cients de vecinas y vecins de Nuez d’Ebro han alcordau desobedeixer as imposicions d’o ministerio de Fomento d’o Gubierno espanyol, que iste maitín procedeba a zarrar l’acceso d’o lugar a la N-II en dirección Zaragoza. Ista mida ha suposau una sorpresa en a zona, que d’a nueit a o maitín y sin información previa, ha visto zarraus os accesos dende Nuez y a urbanización “El Condado”, perteneixient a o termin municipal d’Alfacharín, en a ribera baixa de l’Ebro.

A mida, que “pretende reducir l’elevadismo numero d’accidents en ista carretera, un punto negro en Aragón”, seguntes Fomento, ha suposau a indignación cheneralizada d’as nuecinas y nuecinos, que coinciden que ye “una pesima, inchusta y ineficaz mida que empacha a salida directa de Nuez t’a carretera y suposa importants agravios a o vecindario”.

Antonio Gutiérrez, alcalde de Nuez, ha expresau en l’asamblea “a sorpresa de tot o Concello, ya que asperabanos, dimpués d’a reunión que celebramos o martes con as autoridatz competents, un plazo de 7 u 10 días ta valurar a proposa de Trafico y poder definir a nuestra postura en o lugar”. Y concluyiba que “no han teniu en cuenta dengún d’os nuestros argumentos, como probar qué tal funcionan atras midas planteyadas u no empachar a salida de Nuez d’autobuses de linia, escolars u vehíclos agricolas”.

Sin ir mas luen, iste maitín o Consorcio de Transportes ha decidiu que os autobuses d’a concesionaria, Ágreda, no dentrarán en o lugar en dirección Zaragoza, “porque alteraría os horarios establius”, seguntes declaracions informals d’a companyía, ya que Demarcación de Carreteras no ha emitiu garra comunciación. Como contaba una vecina “isto suposa que ta pillar un autobús dende Nuez hemos d’esnavesar caminando a carretera ta poder plegar dica a marquesina: ninas, mayors, todas as vecinas,… ye una vergüenya y muit perigloso!”. “A N-II ye una carretera muit circulada por transporte de larga distancia, cambions que la plenan as 24 horas d’o día ta evitar os peaches de l’autopista”, indicaba atro vecín.

A reacción d’o lugar no s’ha feito asperar. Meya hora dimpués de finalizar l’asamblea, bells cients de vecinas y vecins han procediu en tasament uns minutos, pasadas as 10 d’a nueit, a retirar os pivotes colocaus iste maitín y que empachaban o chiro t’a cucha dende Nuez t’a N-II. Tamién han cambiau a colocación d’o sinyal de Stop y han procediu a pintar a linia discontina que iste maitín os operarios heban transformau en contina.

L’acción directa s’ha desembolicau sin garra incident, dica que i ha plegau a primer dotación d’a Guardia Civil y una vegada retirada a chent. Sin mediar parola y quan nomás quedaban por a carretera un zarpau de vecins, un uniformau ha trucau a un d’ells, plegando a meter-le a cabeza contra o capó d’un auto y menazando-lo con deterner-lo. A rapeda respuesta d’a chent, que ha esnavesau velozment a carretera ta auxiliar a o suyo paisano, ha evitau mals mayors y no s’ha produciu a detención. Mientres mas de meya hora, cients de personas s’han concentrau baixo dos improvisadas pancartas que solicitaban “Os vecins de Nuez queremos decidir a nuestra mobilidat. Desdoblamiento de l’AP-II” y “Fomento ascuita-nos y deixa o cruce como yera. Amuga a velocidat y libera l’AP-2”.

Pasadas as once d’a nueit, bellas dotacions d’a Guardia Civil continaban en a carretera, mientres operarios procedeban a colocar uns pivotes que empachaban a salida d’o lugar t’a N-II dirección ta Zaragoza. Ye de preveyer que tornen a colocar os pivotes, debant d’o que os vecins han deixau claro que “tornaremos a sacar-los”.

Ta iste viernes, os nuecinos han alcordau en asamblea salir t’a carretera con os suyos vehíclos a las siet d’a tarde, en plena operación salida de vacanzas, ta trucar o ficacio sobre l’important problema de trafico que n’i hai por a suya zona y a necesidat de decisions razonables y que cuenten con a voluntat d’a chent d’o lugar.

En as asambleas que s’han celebrau ista semana en Nuez, os vecins han coincidiu que a reivindicación d’a liberalización de l’AP-II ye esencial ta tresladar ta ixa vía a las decenas de mils de cambions que cada día circulan por un tramo negro que s’ha cobrau ya muitas vidas. Sin ir mas luen, o miercols fallecía en accident a l’altaria d’as benzineras y a Rausán un vecín de Pina d’Ebro. Ixe tramo tan conflictivo podría evitar-se, amás, con un control mas riguroso d’a velocidat.

Por a suya parte, o consellero d’Obras Publicas, Urbanismo, Vivienda y Transporte, Rafael Fernández de Alarcón, o delegau de Gubierno en Aragón, Gustavo Alcalde, y bells tecnicos y directivos de Trafico con os que os Concellos de Nuez y Alfacharín s’han reuniu en os zaguers días continan encerrinaus en desoyir as detalladas proposas d’os vecins y en imposar una serie de midas que no nomás no pareixen lochicas ta reducir a siniestralidat d’a carretera, soque amás suposan levar a zona de conflicto t’a dentrada de Nuez d’Ebro, que actualment no ye zona de concentración d’accidents. As autoridatz competents en temas de trafico mantienen “istas zaborrerías provisionals” seguntes as vecinas y que, seguntes ells, conforman “un plan global” que no accepta proposas alternativas.

En l’asamblea celebrada en Nuez, un vecín ha explicau o “eixemplo de Tierz, en Uesca, a on i hai exactament a mesma problematica que en Nuez. Allí i heba una alta siniestralidat por estar una carretera de muito trafico. Dimpués que Demarcación de Carreteras refusase a proposa d’o Concello de meter una rotonda, metioron dos radars que han disminuyiu considerablement l’accidentabilidad. Por qué no empecipiar por astí?”.

Fuent: http://arainfo.org/2012/08/los-vecinos-de-nuez-de-ebro-desobecen-las-imposiciones-de-fomento/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.