Os vecins d’o Parque Bruil culpan a o concello d’a cayida d’un arbol catalogau

A coordinadera en defensa d'o Parque demandó que o concello prenese midas ta privar que se cayese más arbols

Arbol caito en o Parque Bruil

Arbol caito en o Parque Bruil

A ciercera d’istos diyas ha espaldau en o Parque Bruil un d’os suyos arbols catalogaus. En iste caso ye una acacia de tres punchas (Gleditsia triacanthos) de firme grandaria. A Coordinadera «Vive el Parque Bruil» ha denunciau que ya «dio treslada a lo concello de l’estau d’iste arbol y de que caleba fer un seguimiento d’ell, antimás de meter un refirme en una d’as suyas brancas ya que o peso yera descompensau».

Os vecins denuncian tamién que ista actitut d’o concello ye cutiana y que ya s’ha visto desapareixer muitos arbols, «más d’a metat d’o catalogo aprebau en 2005«. «Os  arbols son l’elemento más valioso d’o Parque», dicen dende a Coordinadera» y por ixo demandan «unatra vegada un plan de protección serioso d’a carrasca y d’os latoners, arbols catalogaus y que si no femos cosa pueden tener a mesma suerte que l’acacia, chenerando, antimás, un grieu risgo t’as personas.

En o mesmo comunicau, a Coordinadera «Vive el Parque Bruil», que arrocla asociacions de vecins, de mais y pais y en esfensa d’o medio natural, ha amostrau o suyo refús a las actuacions que proposa lo Concello de Zaragoza ta fer en a Uerva en o marco d’o Prochecto Life. «A Uerva ye estada maltractada y ixublidada en o suyo pasar por Zaragoza», recordan en a coordinadera ta demandar que as actuacions «han de fer-se con rigor. A suya propuesta alternativa ye de «fer más suau a pendient dende a tapia que bi ha agora dica o cauz, con un camín a o costau de l’augua, parellano a l’actuación feita en l’Ebro, en a marguin cucha, entre o Puent de Fierro y o Jimenez Abad. Tot ixo, d’as trazas más naturalizadas, sin que calga gudrón».

Ta rematar, a coordinadera demanda más participación y diz que ista, no ye nomás «fer reunions con os vecins ta no ascuitar as suyas propuestas. No somos dispuestos a consentir que una vegada más as maquinas dentren en o parque nuestro ta fer-ie actuacions a tot meter sin valurar as alportacions que vecins, ecolochistas y expertos en a materias hemos planteyau».

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.