Os zaguers minutos d’o transito de Venus serán visibles dende Aragón o mierques a’l rayar l’alba.

En o país, nomás sera visible dende l'amaneixer dica la fin d'o trachecto, bells menutos dimpués

Seqüencia d'imachens composadas en o transito de Venus de 2004 (Foto por Antonio Cerezo, Pablo Alexandre, Jesús Merchán y David Marsán (Agrupación Astronómica Deneb)

Seqüencia d'imachens composadas en o transito de Venus de 2004 (Foto por Antonio Cerezo, Pablo Alexandre, Jesús Merchán y David Marsán (Agrupación Astronómica Deneb)

O mierques 6 de chunyo se producirá o segundo y zaguer transito de Venus d’o sieglo XXI. Ista ye una fita important pa os aficionaus a l’astronomía, ya que a venient oportunidat d’alufrar iste fenomeno no se arribará dica l’11 d’aviento de 2117.  O transito de Venus se produz quan a planeta, tamién conoixida como l’Estrelón de l’Alba, Estrel Mayor u Estrel d’es Porquers, pasa por debant d’o Sol, y dende a nuestra planeta se i vei una chicota taca fosca esnavesando o sol de parte a parte.

Encara que en bellas partes d’o globo terraquio o transito se podrá observar dende o suyo empecipio, a las 00:09 (hora aragonesa), en Aragón l’eclix no será visible que dende l’amaneixer dica la fin d’o trachecto que a planeta ferá por debant d’o Sol, bells minutos dimpués. Un mapa global d’o fenomeno en aragonés, se puede veyer aquí  (http://eclipse-maps.com/Eclipse-Maps/ToV_maps_files/ToV2012_PrintMap_Aragonese_1.jpg).

En concreto, en Zaragoza, u en localidatz como Exeya u Alcanyiz, o Sol amaneixerá en l’horizont arredol d’as 6:24, levando dentro a uembra de Venus como si d’un concieto se tractase y o transito será visible por bells 16 minutos.  En localidatz situadas mas enta o nordeste, o sol será visible bells minutos antes, o que permitirán que o tiempo de visibilidat d’o transito arribe a estar de bells 25 minutos en a Vall de Benás.  Por contra, en sudueste d’Aragón, as posibilidatz de veyer o fenomeno minguan. En a ciudat de Teruel, o sol se devantará bells minutos mas tarde, quan a taca producida por a planeta ya será salindo d’o disco solar.

Como ye de dar, a observación d’o transito de Venus nomás será posible si o ciel ye sereno y espazau, y cal alvertir que no s’ha de mirar dreitament a lo sol, ni sisquiera con lunetas u mirallos de sol. A traza recomendable ye fendo prochectar a imachen d’o sol con o lent d’un telescopio. Amás, se’n podrá fer o seguimiento por internet en quantas pachinas, como a d’a NASA

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.