OSTA exiche a la D.Ch.A. y a SARGA veracidat y transparencia

Acusan a lo gubierno de mentir y a la interpresa de falta de transparencia.

Consello d'Administración de SARGA (Foto: D.Ch.A.)

Consello d’Administración de SARGA (Foto: D.Ch.A.)

O sindicato OSTA ha exichiu a la D.Ch.A. y a la interpresa publica SARGA (Sociedat Aragonesa de Chestión Agroambiental), surtida d’a fusión de Sirasa y Sodemasa que “deixen de faltar a la verdat, que prencipien a estar trasnparents y que ixubliden o chuego pactau que i somos feitos pues se van a trobar con una plantillar disposada a esfender os suyos puestos de treballo”.

Istas exichencias y acusacions son debidas más que más a la falta de conoiximiento encara d’o futuro d’os treballadors de SARGA, dimpués de que faigan ya bells quantos meses d’a fusión d’as dos interpresas publicas que la creyoron, Sirasa y Sodemasa,  y que que o conseller de Agricultura y Meyo Ambient anunciase una retallada de 6,4 millons d’euros en o presupuesto de personal d’a interpresa.

Dende o sindicato remeran que a retallada de gastos de personal ye de quasi un 20%.  Cuanto a la información que se dio dende o gubierno de que se heba retallau en altos cargos, pasando de 22 a 10, OSTA denuncia que ixos “no exsleixius los han meso en un ran más baixo mantenendo os mesmos altizos chornals que teneban en as suyas interpresas.” Alavez y debant d’as declaracions d’o Conseller d’Economía decindo que as retalladas en a demba de personal sería minima, o sindicato se pregunta “¿a on va a aplicar-se a debandita retallada?” y “¿Por qué [o conseller] deixa a zero a partida de “provisions” estando ista la que se fa servir ta pagar indemnizacions en una posible presentación d’un ERE?” OSTA creye que se presentará un ERE de dica 300 personas forachitadas.

Tamién acusan a lo Gubierno y a la interpresa SARGA d’estar fendo un teyatro ta confundir a la sociedat y culpar-se mutuament.  Asinas, creyen que bi ha “un Gubierno que alcuerda las condicions [ta l’ERE] pero que s’escuda en que ye a sociedat publica y l’autonomía d’o suyo Consello d’Administración a que decidirá. Y una sociedat publica que no se compromete pero que aplicará un ERE porque o Gubierno no le da diners ta desembolicar as suyas fainas como dica agora”.

Tampoco no son d’alcuerdo con a politica d’externalización de belunas d’as fainas que fa SARGA agora mesmo y consideran “increyible que una interpresa publica externalice a atras interpresas lo que podría fer con o suyo propio personal. Meten como eixemplo a replega de calavres d’animals a on que asoben se sozcontrata a interpresas y autonomos qui “no respetan protocolos ni horarios” y se preguntan si “o Gubierno d’Aragón va a permitir que forachiten a una persona por o feito de que o treballo suyo lo faiga belun que no siga de SARGA”  y si “ye ista una d’as formulas de colaboración publico-privada que tantas vegadas en charra o Gubierno”.

A falta de transparencia ye una atra d’as denuncias que fan, decindo trobar-se de raso desinformaus de man de SARGA, habendo d’enterar-se de bellas decisions interpresarials por a prensa, a tamás de haber demandau qualques vegadas a lo Director Cherent información.

OSTA creye que probablement SARGA siga a primer interpresa que faiga servir o nuevo reglamento de ERE ‘s y clama a la luita  decindo que “han de tener esclatero que os treballadors nos imos a esfender contra os dos: contra un Gubierno que miente y contra una sociedat publica que querrá fer cara de nomás executar as ordens y decisions superiors”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.