Pablo Iglesias será o candidato de Podemos t’as eleccions europeas

Pablo Echenique-Robba, avalau por os Roldes de Discapacidat y de Zaragoza, quedaría en cinqueno puesto en a lista electoral.

Mesa de Podemos t'as primarias (Foto: Rolde de Podemos Zaragoza)

Mesa de Podemos t’as primarias (Foto: Rolde de Podemos Zaragoza)

Pablo Iglesias ye estada a personas trigada por más devintemil votos ta estar o capeza de lista de Podemos t’as eleccions europeas. dimpués d’o proceso de primarias feito por ista formación. D’os candidatos avalaus por os Roldes d’Aragón(seccions territorials u sectorials d’iste partiu) Pablo Echenique – Robba ha quedau cinqueno en numer de votos ta capeza de lista y quarteno t’a fer-ne parte. A lista electoral finitiva alternaría mullers y hombres, quedando-ie o cinqueno.

O proceso de primarias prencipió o 27 de marzo, con 145 candidatos y candidatas que puyoron t’o rete a suya presentación y as suyas razons ta presentar-se  en iste proceso de primarias. Dica o 2 d’abril bi heba tiempo ta votar por o rete. Nomás caleba rechistrar bells datos en a pachina web y tener un telefono movil ta fer-lo, sin haber d’estar miembro de Podemos ta fer-lo. Antimás, ta qui no querese u podese fer-lo on line, se instaloron puntos de votación ta poder fer-lo fisicament, como o que se metió lo pasau 30 de marzo en a plaza d’o Pilar de Zaragoza.

En istos diyas s’han emitiu 33.156 votos, d’os que más de 20.000 han iu ta Pablo Iglesias, fundador de Podemos y empentador d’ista candidatura. O meyatico presentador y profesor d’universidat, ha quedau a muita distancia de Teresa Rodríguez Rubio, qui con 1436 votos ha quedau segunda en a votación ta estar o primer d’a lista. Manimenos, en l’atra votación, a on que caleba esleixir a resta de candidatos t’as europeas, a victoria de Iglesias ye estada prou más achustada: 9936 votos, debant d’os más de 8.000 de Teresa Rodríguez. Antimás de Teresa Rodríguez, Pablo Iglesias compartirá lista con Carlos Jiménez Villarejo, qui estió fiscal anticorrupción de Barcelona, Lola Sánchez y Pablo Echenique-Robba.

Dende Podemos han quiesto destacar la gran participación, remerando que en toda la resta de partius que en han feito, i ha participau menos chent, y que muitos nian en han feito. “Podemos ha contrimostrau que, quan confitas en a chent, a chent responde” ha declarau Juan Carlo Monedero, un d’os suyos portavoces.

Una rispuesta a Pablo Iglesias será o candidato de Podemos t’as eleccions europeas

  1. Pingback: Pablo Iglesias será o candidato de Podemos t’as eleccions europeas » AraInfo

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.