París invoca leis d’a Revolución Francesa ta negar-se a almitir libros de familia en bretón

O ministerio de l'Interior remera que os unicos documentos oficials que valen son aquells escritos en francés. Bells municipios bretons heban escomencipiau a emitir documentos bilingües

bandera bretanyaO ministerio de l’Interior francés plega d’invocar dos leis d’a Revolución Francesa ta negar validez a os libros de familia que qualques municipios bretons heban empecipiau a difundir en versión bilingüe francesa-bretona. Como respuesta a una interpelación d’una diputada bretona, Guittet Chantal, o ministerio ha dito que os documentos oficials nomás se pueden emitir en francés y ha dau como motivo que i hai tres normas que l’especifican clarament. Una ye l’actual Constitución, pero as atras dos son una lei y un decreto d’o periodo revolucionario francés, ye decir, normativas que s’escribioron fa mas de dos sieglos.

Asinas, a respuesta d’o ministerio charra, literalment, de “a lei d’o 2 de termidor de l’anyo II” (ye decir, de 1794) y d’o “decreto consultar d’o 24 de pradial de l’anyo XI” (1801). As normativas especifican que “garra acto publico” de Francia podrá estar escrito en garra atra luenga que no sía a francesa, mesmo en as rechions, explica a respuesta d’o ministerio, a on se i haiga feito a fer servir oficialment unatro idioma.

Un d’os concellos que heba emitiu os libros de familia en bretón y francés ye o de Carhaix, a on l’alcalde ye Christian Troadec, portavoz y fundador d’o partiu bretón Movimiento Bretanya y Progreso (MBP) y consellero d’o departamento de Finisterre. Amás d’istos documentos oficials, Troadec tamién ha aconseguiu que o suyo lugar sía o primer a on a oficina de correus local tien a rotulación bilingüe en bretón y francés.

S’aparca a ratificación d’a Carta Europea d’as Luengas

Y mientres Interior cita textos de fa dos sieglos ta empachar a espardidura d’o bilingüismo, ista semana s’ha confirmau o que ya s’heba iu apuntando mientres os zaguers meses. O president de Francia, François Hollande, ha aparcau a ratificación d’a Carta Europea d’as Luengas Rechionals y Minoritarias (CELRM) dimpués que o Consello d’Estau (ente consultivo d’o gubierno) l’haiga recomendau asinas.

Entremistanto, l’asociación bretona Kevre Breizh ha dito que a decisión de Hollande ye “inacceptable” y que le fa perder “toda a credibilidat”, dau que, cal remerar-lo, l’actual president s’heba comprometiu en campanya electoral a ratificar a CELRM. A Carta ye un instrumento que obliga a os estaus a prener midas concretas t’a protección y promoción d’as luengas minorizadas.

Entremistanto, l’EBLUL/ELEN France, asociación en esfensa d’as luengas minorizadas de Francia, ha dito en una nota ninviada t’os meyos de comunicación que os zaguers movimientos de l’Estau francés son “una faltada a os prencipios alazetals d’os dreitos humanos” y ha acusau a Francia d’estar un país a on se sufre “ausencia de democracia” y de “estau de dreito”.

Fuent: http://www.nationalia.cat/ca/noticies/1380

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.