Pasan a disposición chudicial as quatro personas detenidas por o crimen de Cadrete

As quatro personas detenidas y imputadas por a desaparición y homicidio de Vanesa Barredo, de Cadrete, han pasau a disposición chudicial. O caso ye baixo secreto de sumario

Quatro personas estioron detenidas por a suya presunta embrecación en a muerte de Vanesa Barredo, chovena de 27 anyadas desapareixida en Cadrete. Os detenius son a parella d’a chovena asinas como os tres chirmans d’iste, dos hombres y una muller. Os quatro han pasau ya a disposición chudicial, imputaus por desaparición y homicidio.

O cuerpo d’a muller, despiazau, estió trobau en octubre por uns agricultors en Cadrete y se trafucó con o cuerpo de Pilar Cebrián, de Ricla, que contina en paradero desconoixiu, dica que s’han feito as correspondients prebas d’ADN, que se compreboron con l’ADN d’a filla de dos anyos de Vanesa Barrado. I heba denuncia por a desaparición de Vanesa dende fa un mes, encara que fa dende chulio que no se sabeba brenca d’ella.

O caso ye baixo secreto de sumario, manimenos una vecina de Cadrete confirmó que a posible nueit d’a desaparición se fació una trucada a o numero 116 d’aduya a mullers maltractadas y que posiblement i heba discusions entre Vanesa y a suya parella.

O concello de Cadrete aprebará una declaración de condena a tot atentau contra a vida, encara que no se referirá explicitament a o caso por a poca claridat existent encara.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.