Pasavillas contra os transchenicos en Zaragoza

Contina a semana contra os transchenicos y por a soberanía alimentaria en Aragón

O pasavillas chunto a lo mercau agroecolochico

O pasavillas chunto a lo mercau agroecolochico

A semana de luita contra os transchenicos y por a soberanía alimentaria se fació vistera iste sabado por as carreras d’o centro zaragozano con un pasavillas que marchó dende Sasera dica la Plaza José Sinués, a on se feba un mercau agroecolochico. Bellas decenas de personas han espardiu lemas contra os transchenicos, a transnacional Monsanto, una d’as principals interpresas productoras d’ista mena de cautivos, y por a soberanía y a seguridat alimentaria.

Vistius de mazorcas de panizo, abellas u agricultors, y con una colla de percusión, aturaban debant d’o McDonalds d’o Coso, debant d’a uellada alparcera de muitas d’as personas que i pasaban alavez. O pasavillas plegaba quasi a la una en o mercau a on que se leyeba un manifiesto y se feba un mural de fotos contra os transchenicos. Dimpués, quatre bars d’o vico d’a Madalena – A Flama, La Otra, Barrio Sur y Birosta – feban un socalce agroecolochico feito de tot con ixa mena de productos.

Istos actos son totz aintro d’a Semana de luita contra os transchenicos y por a soberanía alimentaria, que prencipió o pasau 12 de abril y que continará dica o diya 23. Mientres istos diyas, Uesca, Zaragoza u Alcanyiz han estau os scenarios d’os diferents actos que se han feito: charradas, procheccions, rufierta, actuacions u una trobada agroecolochica con tallers.

Os actos continan con un pasavillas en o vico de Torrero que reivindicará la plaza d’o laurelero. Mientres tot lo diya se vivirá una chornada con actividatz, tallers , chuegos, tastadas y intercambio de simients. O lunes l’agroecolochía s’enreligará con a cultura en una chornada clamada “Cultiva cultura” a on que bi habrá presentacions de libros y actuacions mosicals, de 18 a 23 en Treziclo. As chornadas rematarán o martes con una chenta agroecolochica en a Birosta. O programa entero se puet consultar en o blog Aragón sin transchenicos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.