Pedalea celebra que o Concello de Zaragoza refuse a normativa “anti-bici”

O chueves pasoron por bells consulaus en Zaragoza ta demandar "asilo" por a nueva normativa

Ciclistas mientres una protesta

Ciclistas mientres una protesta

O colectivo Pedalea, integrau por chent que esfiende l’emplego d’a bici como meyo de transporte, ha recibiu con goyo a declaración institucional que fació o viernes o pleno d’o Concello de Zaragoza, a on que todas as collas municipals demandoron a la DGT (Dirección Cheneral de Trafico) que reconsidere bells puntos d’a reforma d’o Reglamento de Circulación en lo que pertoca a las bicicletas.

A declaración demanda que no se cambee a normativa que bi ha agora sobre o casco, ta que no siga obligatorio en as zonas urbanas y que se reconoixca o dreito d’os ciclistas a circular por o centro d’o carril suyo. O concello presentará as mesmas alegacions que o Rete de Ciudatz por a Bicicleta, a on que participa.

En os zaguers diyas, concellos de l’estau de diferents colors politicas como Madrit, Barcelona u Murcia, se han pronunciau en o mesmo sentiu. “No hemos d’ixublidar que en as zaguers anyadas hemos viviu una puyada espectacular en l’emplego d’a bicicleta, y son estaus chusto los concellos (uns más que no atros) qui le han dau l’empente que caleba”, dicen dende Pedalea. “Alavez ye natural que dende as instancias municipals s’entienda millor a realidat ciclista y se refusen istas midas, que no alportarían más seguridat pero malmeterían anyadas de politicas de promoción d’a bicicleta.”

Pedalea ha remerau que mesmo alcaldes y concellers d’o PP, partiu que gubierna en l’estau, se son manifestando en contra d’a normativa. Os colectivos ciclistas tampoco no s’han quedau sin tartir, y iste chueves, bellas collas ciclistas entregoron en consulaus europeus de una carta a on que demandaban que “intercedesen debant d’as autoridatz espanyolas, ya que no bi ha garra normativa parellana a la que se quiere aprebar en dengún d’ixos países”.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.