Piden a convocatoria de l’Observatorio d’a Contractación d’o Concello pa mediar en o conflicto d’AUZSA

Contina o conflicto en AUZSA por as 153 personas forachitadas en a nueva etapa d'a interpresa d'autobuses urbanos

Autobús en a Plaza Utrillas (Foto: Macfacizar)

Autobús en a Plaza Utrillas (Foto: Macfacizar)

O grupo municipal de CHA en o Concello de Zaragoza considera prioritario que se convoque de forma urchent a l’Observatorio d’a Contractación d’o Concello de Zaragoza, pa mediar en a polemica d’o transporte urbano. O portavoz d’o grupo municipal, Juan Martín, explica que “iste organo, de caracter consultivo, se creyó en 2012 pa actuar y mediar en istas situacions y habría d’estar qui estase analisando l’actual conflicto, que s’ha chenerau en a contracta d’os Autobuses Urbanos de Zaragoza (AUZSA),  y que por agora s’ha saldau con o despiu de 153 treballadors”.

Martín sinyala que ye urchent que se convoque “ya que en as suyas ordinacions, en o suyo articlo siet concretament, se guarancia a participación de todas as partes i embrecadas, bella cosa fundamental en conflictos de todas caracteristicas, y fa alcordanza que en o suyo punto deceno, referent a las facultatz d’o pleno, iste puede presentar iniciativas, sucherencias y proposas pa estar debatidas en o mesmo pleno u pa o suyo estudeo y informe por a comisión tecnica, asinas como a proposa de solucions y o estudeo d’as queixas d’usuarios y representants sindicals debant d’a chestión d’as contractas, emitindo informe pa os responsables d’a inspección municipal en as diferents arias de Gubierno d’o Concello”.

Asinas mesmo indica que en atro d’os apartaus s’especifica: “Un d’os factors determinants d’a calidat d’os servicios ye o complimiento de totz os requerimientos establius en os pliegos de condicions d’as contractas y entre ells os que se refieren a la efectiva realización de totz os servicios contractaus y a la guarancia d’as condicions laborals d’os treballadors d’as interpresas”.

Juan Martín afirma que “seguntes as noticias amaneixidas en os medios, a interpresa podría no estar complindo iste punto, ya que seguntes pareixe, y dimpués d’os despius, falta personal pa cubrir os servicios contractaus, o que vendría a contrimostrar que os despius no se chustifican”. O portavoz de CHA recorda, en zagueras, que o concello fació una proposa que cal reprener, proposa que CHA y IU refirmoron, por a quala s’aumentaban en 500.000 kilometros o recorriu d’os autobuses en a ciudat de Zaragoza, o que, uniu a una diminución salarial d’un 4,4%, embrecaría un total de 45 despius temporals, que en un plazo de dos anyos en serían zero.

IU expresa a suya solidaridat y refirme a os representants d’os 153 despedius por AUZSA

O concellero Pablo Muñoz ha recibió ahiere a representants d’a recientment creyada plataforma d’extreballadors de l’autobús urbano afectaus por l’ERE d’extinción que ha estrafallau 153 emplegos.

L’edil d’IU ha expresau o refirme incondicional d’o grupo ent’as reivindicacions que han planteyau y ha guaranciau o compromís d’ufrir toda a información disponible, asinas como seguir presionando pa que se produzca una nueva reunión con todas as partes presents.

O grupo municipal d’Izquierda Unida se fa eco d’as denuncias d’os treballadors forachitaus, que aseguran que “se ye fendo horas extras y se ye incomplindo os relevos”.

Dende IU s’insiste en a necesidat de convocar una nueva reunión monografica pa abordar o tema d’os despius en a quala sían presents todas as partes, desvinculando l’expediente d’a negociación d’o convenio colectivo. “En os zaguers momentos d’a negociación as posturas estioron muit amanadas, si a interpresa fese un esfuerzo se podrían privar os despius por medio de baixas voluntarias y indemnizacions”, asegura o concellero de cuchas.

Izquierda Unida ha aplaudiu a creyación d’iste grupo de presión que, de conchunta con o Comité d’Interpresa, “ferá bien visteras as exichencias de treballadors y forachitaus, con os quals somos y seremos en tot momento”.

Fuent: http://arainfo.org/2013/08/piden-la-convocatoria-del-observatorio-de-la-contratacion-del-ayuntamiento-para-mediar-en-el-conflicto-de-auzsa/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.