Piden que Aragón asuma la vichilancia d’as suyas instalacións radiactivas

Ecolochistas en Acción insta a o Gubierno d'Aragón a fer-se cargo d'as instalacións radioactivas d'o suyo territorio por meyo d'a sinyatura de l'alcuerdo d'encomienda de funcións con o Consello de Seguranza Nuclear (CSN). Aragón conta con 813 instalacions radioactivas.

En l’anyo 2010, y seguntes o censo d’o CSN, existiban en Espanya 32.827 instalacións radioactivas. D’ellas, 31.437 son aparatos de rayos X ta usos medicos y 1.390 instalacións radioactivas autorizadas (una de primera categoría, 1.048 de segunda y 341 de tercera). Aragón conta con 813 instalacions, d’as quals 51 son instalacións radioactivas d’investigación, medicas y industrials, y 762 son aparatos de rayos X d’emplego medico (datos de 2010).  Con tot y con ixo, Aragón no ha sinyau encara un alcuerdo d’encomienda.

Os alcuerdos d’encomienda suposan un sistema de colaboración, con contraprestación economica, entre o CSN y as comunidatz autonomas ta l’exercicio d’os cometius vinculaus a la función de vichilancia y control d’a seguranza nuclear y a protección radiolochica atribuius a o CSN. No suposan una transferencia ni una delegación de competencias, sino de funcions.

A primera comunidat en fer-se cargo d’as suyas instalacions radioactivas estió Catalunya. Dimpués d’o resultau positivo d’a experiencia, a Comisión d’Industria d’o Congreso d’os Deputaus instó a os gubiernos autonomicos a la sinyatura de alcuerdos similars. Actualment, o CSN tiene sinyaus convenios d’encomienda con Asturias, Catalunya, Galicia, Balears, Canarias, Murcia, Navarra, País Basco y Valencia. Tal ye l’intrés y intensidat d’a colaboración que d’as 1.815 inspeccions realizadas en 2010, 776 estioron realizadas por o CSN y 1039 por os servicios correspondients d’as comunidatz autonomas con alcuerdo d’encomienda.

Dende prencipios de 2007 no se sinya un nuevo alcuerdo d’encomienda, o qual ye motivo de que a Comisión d’Industria d’o Congreso d’os Deputaus pedise, o 16 d’aviento de 2009, a o CSN que informase d’os problemas trobaus ta continar ista buena practica reguladora. O CSN en a suya respuesta, quatro meses dimpués, se limitó a informar sobre l’intrés d’istes alcuerdos, que heba manteniu contactos d’alto ran con Extremadura y encetau contactos con as comunidatz de La Rioja, Castiella y Leyón, Andalucía y Cantabria, d’o que se deduz que Aragón leva un retardo mayor que a resta de comunidatz.

A la vista d’ixo, Ecolochistas en Acción, s’ha endrezau a la presidenta d’o Gubierno d’Aragón. Luisa Fernanda Rudi, instándo-le a sinyar un alcuerdo d’encomienda de funcións con o CSN ta fer-se cargo d’a seguranza d’as instalacions radioactivas d’Aragón. A enorme proliferación d’instalacions radioactivas fa que o CSN no tienga meyos ta guarenciar plenament a seguranza de todas ellas.

T’a organización ecolochista se fa imprescindible que as comunidatz autonomas, que son os achents mas proximos a las instalacions, se faigan cargo d’as inspeccions, vichilancia y control.

Fuent: http://www.ecologistasenaccion.org/article22662.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.