“Pirineos Sur” presenta a suya programación

As "mosicas urbanas" protagonizarán ista edición, que prencipiará o 12 de chulio

cartel2013A Val de Tena tornará a estar o scenario de Pirineos Sur, Festival Internacional d’as Culturas que fa a suya XXII edición pleno de rasmia y con una apuesta arriscada y fuerte por as mosicas d’o mundo. As metropolis y a “mosica urbana” protagonizarán ista anyada dende o 12 dica o 28 de chulio o festival. “Nos centraremos en as mosicas urbanas, en as que naixen y se cuecen en as grans ciudatz, fruito de diferents realidatz y mezclallos”.

“Ye en as grans ciudatz a on que trobamos muitos d’os creyadors d’as mosicas populars d’agora. Lo que ye lochico en estar en contino creiximiento y transformación a on que se fan cruces, trobadas y mezclas. Son mosicas a on que a tradición y a tecnolochía s’achuntan, a on que a suya polideza pende más d’o concepto y a capacidat de creyación que d’os intruments emplegaus en executar-las”, dicen dende a organización. En anteriors edicions s’han tocau tematicas de tot lo mundo y de toda mena: dende a mosica africana dica a Mediterrania, pasando por a Lusofonía, dica America d’o Norte u o Caribe  y Latinoamerica.

A presentación d’o programa se fació iste miercols en a siede d’a DPH a on que Luis Calvo, director d’o festival ha repasau as collas que i tanyerán. Os mosicos serán plegaus dende ciudatz de tot lo mundo: Kinshasa, Boston, Barcelona, Casablanca, Montevideo, Jaipur, Amsterdam, … Prou que tampoco no i faltarán as collas y artistas aragoneses, representaus por mosicos como The Faith Keepers, Enrique Amador “Musi”, Maut, Raúl Usito “Pecker” u Rapsusklei & The Flow Fanatics.

Manel y “Eli Paperboy” Reed serán qui enceten o festival o 12 de chulio en l’auditorio natural de Lanuza. Por ixe mesmo puesto pasarán estrelas como Café Tacuba, Estrella Morente, Salif Keita u Paco de Lucía, entre muitos atros. Antimás d’o scenario de Lanuza, Sallent tamién acullirá a programación de baldes “Diyas de Sur” a on que se ferán conciertos, performances, pasavillas, circo, actividatz t’as familias u exposicions.

Antimás de fer más de 60 actividatz de baldes, estianyo Pirineos Sur facilitará, de conchunta con La Zaragozana, unas entradas “de baixo pre” que se podrán mercar entre o 15 y o 30 de mayo en www.ambarmusic.com ta que pueda ir-ie toda la chent posible. O programa entero se puet consultar en a web d’o festival.

 

 

 

Una rispuesta a “Pirineos Sur” presenta a suya programación

  1. Pingback: Pirineos Sur presenta a suya programación | AraInfo | Achencia de Noticias d´Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.