Pleno de Cortz en Sant Chuan d’a Penya ta remerar l’estatuto de 1982

As collas parlamentarias refirman l'autogubierno curto de lo 82 y o 2007 ta concarar a crisi

O president d'as Cortz, José Angel Biel, en l'acto (Foto: CHA Cortes)

O president d’as Cortz, José Angel Biel, en l’acto (Foto: CHA Cortes)

En un pleno especial en o monasterio de Sant Chuan d’a Penya as Cortz d’Aragón han remerau l’aprebación d’o primer estatuto d’Autonomía d’Aragón, que dentró en vigor en agosto de 1982. Ixe primer estatuto fació dentrar a lo país por o camín d’as autonomías “lentas”, luen d’o livel de competencias d’as ditas autonomias historicas. En ixe inte a UCD, en a que i yera por eixemplo José Ángel Biel, Alianza Popular y o PSOE, que ya heba fagocitau a o PSA, decidioron no fer dentrar l’estatuto en o carro d’as autonomias historicas.

En l’acto de hue, o gubierno y as collas parlamentarias han refirmau l’autogubierno como aina ta salir d’a crisi, partindo de l’estatuto aprebau en 2007, que estió refusau por CHA. Ista colla parlamentaria, por boca d’a suya vocera, Nieves Ibeas, ha feito servir l’aragonés en a suya intervención de hue ta reivindicar una “rearagonesización” d’o país. Nieves Ibeas ha criticau l’actual reforma estatutaria que no aluenya periglos como o trescole de l’Ebro y ha remerau viellas aspiracions como o paso por Canfranc, y l’Estatuto de Caspe de 1936 que no plegó a aprebar-se por o prencipie d’a guerra civil espanyola.

O vocero de IU, Adolfo Barrena, ha  criticau o proceso de recentralización que se ye vivindo en l’estau espanyol y ha remerau a Vicente Cazcarra, o viello dirichent comunista que alertaba de l’expolio a que yera chusmeso Aragón. Por parti d’o PAR ha charrau Alfredo Boné, qui ha resaltau os abances d’Aragón en istos anyos d’autogubierno, destacando l’AVE, a Expo de Zaragoza, a Radio y Televisión publicas aragonesas u as plataformas lochisticas. Boné ha dito que sin d’estatuto Aragón tornaría a estar tierra d’emigrants, como, seguntes ell, “ye tornando a pasar, en un camín que s’ha d’aturar antis con antis”.

Javier Sada, vocero d’o PSOE, ha incidiu que retallar l’autonomía deixaría sin armas ta luitar contra la crisi, y ha reclamau que l’Estatuto siga estando guarancio de l’estado de bienestar ta totz os ciudadans aragoneses. Antonio Torres, d’o PP, ha remarcau a voluntat de pacto d’o primer estatuto y d’a suya reforma de 2007, que ha feito plegar a Aragón en cotas de progreso que yeran “impensables”.

A presidenta d’Aragón, Luisa Fernanda Rudi tamién ha charrau en iste sendito, porque seguntes ella l’Estatuto ha “feito alportacions alazetals ta o buenpasar d’os aragoneses”. Ha quiesto tamién refirmar o paper d’as institucions autonomicas que “continan estando o millor traste ta o funcionamiento democratico”.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.