Polemicas, retalladas y movilizacions en o prencipie d’o curso escolar

O curso prencipia con pleitinas entre a consellería d'educación y a comunidat educativa

Protesta contra as retalladas en educación o pasau 21/08 (Foto: Primo)

Protesta contra as retalladas en educación o pasau 21/08 (Foto: Primo)

O nuevo curso escolar ye en momentos de prencipiar y ya tien ubiertos bells frents de baralla t’a consellería d’educación. Encara que ahiere o gubierno demandaba un prencipio de curso “normal” pareix que no será asinas.

110.000 alumnos y alumnas prencipiarán iste 10 de setiembre o nuevo curso escolar. 556 más que no en o curso 2011-2012. Manimenos, entre profesors y mayestros a cifra baixa en cuentas de puyar respecto a l’anyada pasada: 16800 profesionals en cuentas d’os 17.300 que prencipioron en septiembre de 2011, seguntes fuents de l’administración.

Ixas mesmas fuents dicen que bi habrá 450 docents achustaus menos. D’atra man, o sindicato CGT no ye mica d’alcuerdo con ixos numers. Seguntes iste sindicato, serían 579 as plazas no cubiertas. Mesmo, contando as chubilacions no cubiertas, a cifra puyaría dica los 1100.

A semana pasada yeran os directors de centros escolars los que se concaraban con as zaguers midas y retalladas en o sector educativo, menazando con una dimisión masiva. A Chunta de Personal d’Educación, a on que bi ha representants d’a más gran parti de sindicatos, ferá conoixer ista mida de presión mientres istos diyas. En caso de chuntar a más d’o 50% d’os directors de centros disposaus a dimitir, istos lo ferían totz de conchunta. S’han convocau, antimás, concentracions en muitos d’os centros educactivos d’o país t’o venient diya 10, quan prencipian as clases.

De man d’a Marea Verda Aragón (Asambleya de Docents por a Educación Publica) tamién se son convocando protestas y movilizacions. Maitin a Marea celebra una asambleya ubierta en o Salón d’Actos d’a Facultat d’Economía y Interpresa (a siede d’a Gran Vía zaragozana) ta charrar sobre as zaguers midas y sobre as posibles movilizacions y convocatorias.

Os estudiants tamién planteyan accions en esfensa d’a educación publica. O colectivo Universidat ha convocau, de conchunta con atras organizacions estudiantils independentistas y de cuchas a ran estatal un “Diya internacional de movilización y luita d’os estudiants” o venient 11 d’octobre, encara que no s’han concretau os actos que se ferán.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.