Portugal vive unatra vaga cheneral

Ye a quartena vaga cheneral en dos anyos convocada en Portugal contra as midas d'austeridat empentadas por o Gubierno portugués y a UE

vaga cheneral Portugal

A policía portuguesa preba de desaloixar un piquete en o servicio publico d’autobuses. Foto: CGTP

A Confederación Cheneral de Treballadors de Portugal (CGTP) y a Unión Cheneral de Treballadors (UGT), sindicatos mayoritarios, convocoron una nueva vaga cheneral iste chueves en contra d’as nuevas midas d’austeridat d’o Gubierno portugués de Passos Coelho, impuestas dende a UE por o rescate financiero. Ista ye a quartena vaga cheneral en o país luso en os zaguers dos anyos. Os dos sindicatos culpan a o gubierno de que s’haigan perdiu 300.000 puestos de treballo, amás de prever-se perda de poder adquisitivo en pensionistas y funcionarios, y claman a estudiants, treballadors, esqueferaus y chubilaus a unir-se-ie.

A pasada semana ya se vivioron movilizacions debiu a una vaga de profesors mientres os examens d’acceso a la universidat que consiguió d’atrasar a lei que permite fer fuera a mils de funcionarios. Ahiere una colla de chubilaus y chubiladas cantó “Grandola, Vila Morena”, himno d’a Revolución d’os Clavels en o parlamento, interrumpindo a o Primer Ministro portugués.

A vaga ha aturau buena parte d’o transporte publico, sector an que tien una mayor incidencia, destacando o metro y o servicio ferroviario, que son de raso aturaus, estando-ne menos atros transportes publicos como autobuses, tramvías, trafico fluvial y aerio, encara que rechistran elevaus datos de seguimiento. Iste ature ha provocau entrasques en as grans ciudatz portuguesas debiu a un aumento d’o trafico.

En atros sectors, como limpieza y vasueras, a incidencia ye estando muit alta. En o sector sanitario, l’atención ye lenta y con restriccions. Tanimientres, s’asperan datos sobre o sector privau (que gosa tener una menor incidencia) y l’administración publica.

De tardes se ferán en tot o país manifestacions convocadas por os dos sindicatos mayoritarios en refirme d’a vaga y contra as midas d’austeridat.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.