PP, CiU y UPN apreban a reforma laboral en o Congreso espanyol

O Pleno d’o Congreso d’os Deputaus espanyol ha aprebau hue, con 197 votos a favor y 142 en contra, a convalidación d’o Reyal Decreto de midas urchents ta la reforma d’o mercau laboral, y alcordó, con l’emparo de 337 deputaus, y l’abstención d’un, a suya tramitación como prochecto de lei por o procedimiento d’urchencia, la qual cosa permitirá adhibir esmiendas antes d’a suya aprebación definitiva. A favor ha votau a colla Popular, Convergència i Unió y o deputau d’UPN.

A ministra espanyola d’Emplego, Fátima Báñez, ha esfendiu o decreto porque diz que “pretende creyar as condicions necesarias ta que a economía espanyola pueda tornar a creyar emplego y asinas chenerar a seguranza necesaria ta treballadors y interpresarios, ta mercaus y inversors”.

A reforma comprende midas ta empentar, seguntes a ministra, a posibilidat d’emplegar-se d’os treballadors, reformando aspectos relativos a la intermeyación laboral y a la formación profesional. Se rebaixará a indemnización de 45 días por anyo treballau a 33, con un maximo de 24 mensualidatz. a indemnización procedent será de 20 días por anyo treballau y con un maximo d’un anyo de salario. A ministra de Treballo, Fátima Báñez, tamién ha anunciau que dende l’anyo que viene se prohibirá o encadenamiento de contractos temporals dillá d’os dos anyos.

Amás, o gubierno espanyol introducirá un nuevo contracto indefiniu t’os emprendedors, con una bonificación de 3.000 euros a las interpresas de menos de 50 treballadors que contraten o primer treballador menor de 30 anyos y aturau. O treballador contratau podrá cobrar o 25% por a prestación por desocupación y l’interpresario podrá deducir en o plazo d’un anyo o 50% d’o total que a o treballador le quede ta percibir.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.