PP y PSOE ganan en Aragón perdendo arrienda votos

Podemos protagoniza a sorpresa electoral quedando como tercer fuerza en Aragón

capO PP ye estau lo partiu más votau en Aragón en as eleccions europeas  con 127.834 votos (27,85 %), a poca distancia d’o PSOE que queda segundo con 111.641 (24,32%). Entre os dos partius suman bell poco más d’a metat d’os votos feitos en a chornada d’iste sabado. Istos resultaus son interpretaus como una gran redota en haber perdiu cadagún d’os dos grans partius espanyols decenas de millars de votos, respecto a las anteriors eleccions.

A sorpresa electoral plegó dende Podemos, partiu constituyiu fa tasament bells meses. Pablo Echenique-Robba, aragonés  qui ocupaba o cinqueno puesto en a lista d’ista formación, irá a la fin t’o Parlamento Europeu en haber-se conseguiu cinco eurodiputaus. Antimás, consiguen quedar os tercers en o país por debant de Izquierda Unida, encara que quasi empataus. Os dos partius rozan o 10 % de votos.

Izquierda Unida y UPyD tamién replegan muitos d’os votos carranyaus con o bipartidismo. Os dos partius puyan en más de vinte mil votos y consiguen un 9,41% y un 8,53% de l’electorau. Por dezaga quedó Primavera Europea, coalición formada por Chunta Aragonesista, Compromís y Equo, antimás d’atros partius más chicotz, y que consiguió en Aragón 20.625 votos.

Aragón contará asinas con a presencia de tres eurodiputaus aragoneses, de PP, PSOE y Podemos. IU y UPyD tamién consiguioron 6 y 4 eurodiputaus. Primavera Europea en consiguió unatro que ocupará Jordi Sebastià, de Compromis. Tamién a coalición Os pueblos deciden, a on que ye o partiu politico independentista aragonés Puyalón, tendrá representación en europa, a traviés de Josu Juaristi, de EHBildu, partiu que encapezaba la coalición.

Por debaixo d’o 3% de voto quedoron atras candidaturas como Ciudadanos, VOX, Escaños en blanco, PACMA, Partido X, Movimiento Red, Puyalón, Piratas y Recortes Cero. L’abstención tornó a estar prou gran, quedando en un 53,06%.

Encara que radida, PP y PSOE, han feito autocritica d’os resultaus, amostrando preocupación por as baixadas que han teniu. En l’atro cabo i son a resta de partius, por un regular prou contentos d’a situación creyada en crebar-se o bipartidismo.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.