PP y UPyD se niegan a condenar o franquismo

No quieren que o 18 de chulio siga o día contra o franquismo. A proposa la presentoron o martes Izquierda Unida y ICV en o congreso espanyol

val cayiusO grupo d’a Izquierda Plural (Izquierda Unida, ICV-Verdes y Chunta) presentó o martes a o parlamento espanyol una proposición de lei ta declarar o 18 de chulio, oficialment, día de condena d’a dictadura franquista. O Partiu Popular votó contra a proposa, aducindo que a constitución ya heba superau os debatz sobre o pasau y agora caleba mirar t’o futuro. UPyD s’abstenió y, pues, s’adhibió a la negativa d’o PP de condenar o franquismo.

UPyD lo feba saber por medio de dos tuitz de Twitter : ‘Condenamos qualsiquier dictadura, crimen y qualsiquier mena de negacionisme? Obviament sí. Por una vía declarativa, que ubre debatz historicos, cicatrices, y convierta o parlamento en una academia d’historia? Obviament no.’

Antiparti, o PSOE, o PNV y os grupos de cucha d’o grupo mixto votoron a favor d’a proposición de lei ta que se podese debatir.

En a mayoría d’os países europeus que vivioron una dictadura en o sieglo XX s’han instituiu chornadas de condena d’o rechimen u bien de memoria de qui resistioron. Espanya en ye una excepción, ya que quasi uitanta anyos dimpués d’o golpe d’estau encara no i hai garra declaración oficial de refuse a la rebelión encabezada por o cheneral Franco.

Tardà, a o PP: ‘Sotz a vergüenya d’o mundo democratico’

En o debat d’a proposa, o portavoz d’IU-ICV, José Luis Centella, esfendió a proposición de lei como una iniciativa oportuna y necesaria porque as victimas amenistan que se sepa a verdat y que se reparen os danyos que causó a dictadura. ‘Hue encara mas de 100.000 espanyols continan desapareixius dende a guerra civil, mientres que se mantiene o dictador enterrecau en un gran monumento, compartindo l’espacio con as suyas victimas’, dició Centella.

Antiparti, Joan Tardà (ERC) dició a os diputaus d’o PP que yeran ‘a vergüenya d’o mundo democratico‘, y l’aprofitó ta demandar a dimisión d’a delegada d’o gubierno espanyol en Catalunya por haber feito homenache a os miembros d’a División Azula nazi. Amás, recordó que Manuel Fraga yera corresponsable d’a represión y que o rei Juan Carlos yera complice d’os asesinatos d’a dictadura quan yera prencipe.

Fuent: http://www.vilaweb.cat/noticia/4117378/20130522/pp-upyd-neguen-condemnar-franquisme.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.