Premio Atila 2012

Con motivo d'a celebración d'o Día Mundial d'o Meyo Ambient, Ecolochistas en Acción celebra una nueva edición d'o Premio Atila ta premiar a aquellas personas y entidatz que haigan destacau por a suya contribución a estricallar o meyo ambient.

José Manuel Soria, Premio Atila 2012 (Foto: Wikipedia)

O 5 de chunio ye a calendata eslechida por a ONU t’a celebración d’o Día Mundial d’o Meyo Ambient. Iste anyo se cumple o 40 cabo d’anyo d’iste día y lamentablement lo cierto ye que en istes 40 anyos a crisi ecolochica no ha feito sino profundizar-se.

Por iste motivo, Ecolochistas en Acción concede os premios Atila con l’obchectivo de distinguir y denunciar a aquellas personas y entidatz que han destacau por a suya contribución a estricallar o meyo ambient mientras o 2012.

Os Premios Atila constan d’un primer premio denominau Atila y d’un accesit denominau O caballo d’Atila. Iste anyo, como novedat, se concede un tercer premio en a categoría especial 2012, denominau “Anca d’Atila”.

Premio Atila: Ministro d’Industria, Enerchía y Turismo, José Manuel Soria, por o suyo caracter cerenyo en mantener un sistema enerchetico insostenible y en mans d’uns pocos. En o segundo Consello de Ministros d’o Gubierno d’o PP, Soria prenió a decisión de ubicar o ATC en Villar de Canyas (Cuenca), solo le calión que dos semanas ta prener a decisión d’án ubicar os residuos radioactivos que remanirán mientras millóns d’anyos en o territorio; poco dimpués, en febrero, confirmaba a prorroga ta que a central nucleyar de Garonya funcione dica 2019. Como colofón a iste elenco d’apuestas por a sostenibilidat, en marzo, dio luz verda a las prospeccións petroliferas chunto a las islas de Lanzarote y Fuerteventura, que ferá Repsol y suprimió os incentivos economicos ta nuevas instalacions d’enerchías renovables.

Premio Caballo d’Atila: Bankia y CaixaBank por arrasar a las personas y a o planeta. Bankia nacionaliza as suyas perdas dimpués d’anyos d’especulación, más que más immobiliaria, qualos impactos socials y ambientals se miran que no sían reparaus por qui los producioron. D’o viés, agora fa servir os diners d’os retalles socials ta cubrir os foraus d’os suyos desmans. CaixaBank por a suya parte tamién ha recibiu importants aduyas publicas t’amagar as suyas inversions immobiliarias fallidas. Amás ha denunciau a activistas d’Ecolochistas en Acción por amostrar a responsabilidat d’iste banco en o boom immobiliario y en a destrucción social y ambiental d’o modelo petrolero representau por Repsol, d’o qual ye o prencipal accionista.

 Premio especial 2012, Anca d’Atila: Rei d’Espanya, Juan Carlos de Borbón, por as suyas cinecheticas trazas d’amostrar o suyo menosprecio por a situación de crisi que ye vivindo a población espanyola, de’elefantes y de qualsiquier atro animal que se le “meta a tiro”. Y por a suya negativa a disolver una institución arcaica, inchusta, cara y inutil: a Casa Reyal.

 

O Churau expresó a suya asperanza en que a concesión d’istes premios truque o ficacio d’os premiaus sobre o deterioro ambiental que sufre a nuestra planeta.

Fuent: http://www.ecologistasenaccion.org/article23396.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.