Prencipia a chornada de vada cheneral

Prencipia a vada cheneral en Aragón con os piquetes en as darias de nueitz d'os prencipals poligonos industrials

Os servicios minimos salindo de FCC

A vada cheneral ha prencipiau con diversos piquetes en grans interpresas y poligonos. En a capital aragonesa, en FCC, a las 23 h. yera convocau un piquete que i ha arroclau a unas 250 personas. Os 14 cambions de servicios minimos han saliu d’a interpresa con un cordón policial escoltando-los. Una vegada salius, as puertas d’a interpresa s’han zarrau y no’n han saliu mas vehiclos. Chusto dimpués a policía ha albandonau o piquete. L’ature, sin contar os servicios minimos, ye total en daria de nueitz.

Piquete en FCC

A las 23 h. tamién, CNT convocaba una concentración en a Pza. S. Miguel que ha derivau en manifestación enta FCC y Tuzsa.

Difuera d’a capital, en Opel, l’ature ye total, mientres en Johnson Controls CGT l’ha calculau en un 80%. En HP, tamién CGT calcula l’ature en un 90%.

A Delegación de Gubierno ha desplegau ya a coches patrulla d’a Policía Nacional espanyola ta cusirar puntos conflictivos mientres os antidisturbios tanto d’iste cuerpo policial como d’a Guardia Civil se despliegan en os poligonos industrials y atros puntos conflictivos. Dende AraInfo, informan de l’acoso policial en as carreras de Teruel.

O consumo electrico por agora ha baixau un 5,28% respective d’ahiere a las 0 h. En a vada d’o 29 de marzo baixó un 8,81% respective a o diya anterior.

De nueitz continarán os piquetes. Os mas visters, o piquete de Mercazaragoza a las 2:30 h., o piquete en Tuzsa a las 4:30 h., o piquete de Lecitrailer a las 5:30 h., y en Teruel a las 4:45 h. o piquete en a Ronda Ambeles, y atras convocatorias t’o maitín.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.