Prencipia a Feria d’o libro de Zaragoza

A Plaza Aragón acullirá as 56 casetas mientres os 10 diyas de feria.

cartelA Feria d’o libro plega una anyada más ta Zaragoza en prencipiar chunio. En ista edición serán 56 as casetas de más de 30 entidatz que se podrán visitar en a Plaza Aragón dende o diya 1 dica o 10. En ixos diez diyas, serán más de 60 os autors que sinyarán as suyas obras y que aprofeitarán ta conoixer a os suyos lectors y fer-se conoixer entre os potencials.

O pregón d’a feria lo leyerá Jose Manuel Blecua, director d’a Reyal Academia Espanyola (RAE), o diya 1 a las 20:30 en l’edificio de l’antiga Capitanía.

En iste scenario d’a feria se ferá a dentrega d’os premios de literatura d’o gubierno d’Aragón, como ya ye constumbre. En ista anyada, Angélica Morales ye estada a ganadera d’o Miguel Labordeta de Poesía, Oscar Latas ha conseguiu l’Arnal Cavero ta obras en aragonés y Carles Teres ta obras en catalán. O premio a lo ‘Millor libro editau en Aragón ha iu ta ‘Un día me esperaba a mí mismo’ (Editorial Jekyll & Jill) y o premio t’a trachectoria profesional en a demba d’o libro d’Aragón lo ha conseguiu a Editorial Acribia.

As nueitz d’os chueves, viernes y sabados, a literatura marchará tamién ta os pubs d’a ciudat. ‘El poeta eléctrico’, ‘El refugio del crápula’, ‘Monbasa’ y o ‘Juan Sebastian Bar’ tendrán actividatz de lecturas, humor u poesía.

Antimás tamién se i ferán os clamaus ciclos, como o de Literaturas d’o Mundo, adedicau a Mexico u o Ciclo de Literatura Fantastica ‘Fillos de Mary Shelley’ a on que once autors recentarán relatos de terror que serán publicaus en venients edicions d’a feria. Tot lo programa se puet consultar en iste vinclo.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.