Prencipia a muestra de cine más chicota d’o mundo en Ascaso (Sobrarbe)

O festival prochectará entre o 26 y o 30 cine europeu de diferents autors. Tamién se ferán charradas dimpués d'as procheccions

festivalIste hibierno, o lugar d’Ascaso ha tornau a baixar d’habitadors. Nomás cinco personas i son empadronadas. T’o lugar, amán de Boltanya, s’arriba por una pista meyo asfaltada. Contina sin luz electrica ni sistema de saneamiento encara que de promesas les n’han feito. Pero como cada estiu, os vecins fan o suyo particular chilo rebelde: un Festival de cine, no competitivo, por a on que pasan belunas d’as peliculas más premiadas d’o cine europeu.

Con un presupuesto radiu, de tasament 5000 euros, ista edición contará con 24 voluntarios y en a pasada edición tenió un aforo de 122 personas. Tamién puede presumir de que, tot y con un presupuesto chicot, paga por as peliculas prochectadas. T’os dos codirectors , Néstor Prades y Miguel Cordero “se acabó lo tiempo quan iban a los directors demandando-les favors”. Ta poder concarar os gastos d’a muestra, a la entrada de cada pelicula, os miembros de l’asociación que convoca, demandan un donativo de bell par d’euros. A suya especial pasión por o cine francés, les ha feito trobar antimás un buen aliau: l’Instituto Francés de Zaragoza, que paga los gastos d’as peliculas prochectadas en ista luenga. Ascaso lidera tamién, una coordinadera de chicotz festivals “Cine Gran en Chicot” (www.cinegrandeenpequeno.org) que en tot l’estau, preba d’ixemenar iste modelo de distribución que califican de sostenible.

Iste martes, de devantadera d’a muestra, Ascaso prencipiará con “Costa da Morte”, a pelicula gallega de Lois Patiño que ganó lo festival de Locarno de 2013. O festival se prolargará dica lo venient diya 30. Dende a organización recordan que atra d’os sinyals d’identidat d’o festival, antimás d’o cine d’autor y independient, ye viyer-lo baixo a nueit estrelada d’o Pirineu, en un d’os ciels más limpios d’a Peninsula Iberica.

Toda la información sobre o festival, as procheccions y a organización se puede trobar en a web www.cineascaso.org

Una rispuesta a Prencipia a muestra de cine más chicota d’o mundo en Ascaso (Sobrarbe)

  1. Pingback: Se inaugura la III Muestra de Cine de Ascaso (Sobrarbe-Huesca), la muestra de cine más pequeña del mundo (ARA)

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.