Prencipia la campanya electoral t’as europeas

41 listas participan en istas eleccions. Entre ellas, Primavera Europea y Os Pueblos Deciden bi incluyen partius nomás d'Aragón

Scenario a on que se fació a devantadera de campanya d'o PPA nueit d’o chueves prencipió oficialment a campanya t’as eleccions europeas. Encara que l’ambien electoral ya leva bells meses calentando-se, os actos propiament de demanda de voto, prencipioron ahiere. A ciudat que esleixioron os partius ta fer os actos más potents estió Zaragoza, con prou diversidat de propuestas y scenarios, encara que bellas formacions tamién facioron actos en atras localidatz.

O PP trigó la Plaza de Sant Agustín ta presentar a suya candidatura en un acto con intervencions d’a Presidenta d’o Gubierno Luisa Fernanda Rudi y de Veronica Lope, candidata aragonesa que va en o deceno puesto d’as listas d’iste partiu. En os discursos, os representants d’o PP esfendioron as politicas que han levau os gubiernos nacional y estatal, y denuncioron una vegada más l’herencio recibiu por o gubierno de Zapatero. Lo facioron en un ambient tenso debiu a los chilos que, dende as finestras y balconadas d’a Plaza y d’a Carrera Sant Agustín les adedicoron parte d’os vecins, que les acusoron de “chorizos” y “mentirosos”, entre atras cosas. O zaguer barometro d’o CIS da a ista formación entre 20 y 21 eurodiputaus.

O PSOE s’esfendió, en l’entorno d’a Gara d’o Norte, como modelo alternativo a la Europa d’o PP, la “d’os paradisos fiscals, as desigualdatz y os retalles”. Frent a ixo, o PSOE proposa un modelo que “proteche, cohesiona, chenera treballo y ye guarancia t’os chovens”, dició Inés Ayala, candidata aragonesa que ocupa o treceno puesto en as listas d’o partiu ta Europa. L’ambient tamién estió alticamau por a presencia d’una protesta d’os treballadors de Parques y Chardins, qui remeroron o conflicto existent en o concello de Zaragoza. A policía identificó a belunas d’as personas que i estioron protestando. O zaguer barometro d’o CIS da a ista formación entre 18 y 19 eurodiputaus.

“El poder de la gente” (O poder d’a chent) ye o lema trigau por Izquierda Unida en ista convocatoria electoral. L’acto central se fació en o Club Nautico de Zaragoza, a on que reivindicoron o suyo papel y importancia ta “desinstalar o bipartidismo“. Francisco Iturbe, candidato aragonés independient que ocupa o treceno puesto d’a lista i estió present, chunto a buena cosa de cargos, militants  y simpatizants d’ista formación. O zaguer barometro d’o CIS da a ista formación cinco eurodiputaus.

Chunta Aragonesista, qui ye aintro d’a coalición Primavera Europea, chunto con Compromís y Equo, entre atras formacions, presentó a la suya candidata Ángela Labordeta, qui ocupa o tercer puesto d’a lista ta Europa. Os representants de CHA esfendioron votar-les ta “pasar d’o carranye t’o compromís” y costruyir “a Europa d’as personas. O zaguer barometro d’o CIS no da a ista formación garra parlamentario quedando-se con un 1,2% d’o voto.

Puyalón de Cuchas, qui fan parte d’a coalición Os Pueblos Deciden, chunto con EH Bildu y BNG, presentó as suyas propuestas soberanistas en a Plaza Europa de Zaragoza. Esfienden que o suyo voto “ye o que más mal les fa” y que quieren “decidir-lo tot y cambiar-lo tot“. Antes de prencipiar l’acto, a policía espanyola identificó a beluns d’os asistents, lo que iste partiu calificó de represión. O candidato aragonés, Valentín Cazaña, qui ye antimás president de COAGRET, ocupa o numer 17 d’a lista d’a coalición t’as europeas. O zaguer barometro d’o CIS da a ista formación un eurodiputau.

UPyD tamién criticó lo bipartidismo PP-PSOE y se reinvindicó como ferramienta contra ell, denunciando tamién a corrupción de PP y PSOE. Lo fació a traviés d’o suyo candidato aragonés, Carlos Aparicio, qui ocupa o puesto 38eno en a lista d’a formación ta Europa. O zaguer barometro d’o CIS da a ista formación tres eurodiputaus.

Podemos, una d’as formacions que se presenta por primer vegada ta unas eleccions, presentó a suya candidatura en o Parque Bruil de Zaragoza. I estió lo candidato Pablo Echenique-Robba, qui ocupa o cinqueno puesto d’as listas esleixidas en un proceso de primarias ubiertas. Iste nuevo partiu demandó o voto d’a ilusión  y esfendió que “sí se pueden cambiar as cosas. O zaguer barometro d’o CIS da a ista formación un eurodiputau.

Acto de IU (Foto: @iu_aragon)

Acto de IU (Foto: @iu_aragon)

 

Acto de Puyalon (Foto: Puyalon)

Acto de Puyalon (Foto: Puyalon)

Acto de Podemos (Foto: @PodemosZaragoza)

Acto de Podemos (Foto: @PodemosZaragoza)

Acto de CHA y Equo (Foto: @chunta)

Acto de CHA y Equo (Foto: @chunta)

Acto d'o PSOE (Foto: @JLAmbanM)

Acto d’o PSOE (Foto: @JLAmbanM)

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.