Prencipia la campanya “Vive l’Ebro” d’actividatz arredol d’o río

Mientres toda l'anyada se ferán actividatz ludicas, esportivas y medioambientals. A campanya prencipia iste sabado con una fiesta.

EbroO concello de Zaragoza, de conchunta con as federacions de Piragüismo, Remo y Pesca, os clubs esportivos Helios y Naútico y asociacions como Iberflumen u Ebronautas, prencipian una campanya d’actividatz esportivas d’educación ambiental y d’ocio sano, arredol d’o río Ebro, baixo lo nombre de “Vive l’Ebro”. A campanya prencipia iste sabado 20 con mosica, gambadas en moto y esquí acuatico, amostranza de chuegos tradicionals y disco movil. O domingo continarán as actividatz arredol d’o embarcader de Vadorrei.

A semana venient prencipia tamién o programa “Ebro limpio” de conchunta entre o concello y Ebronautas con actividatz d’escosque y educación ambiental, que se prolargará dica las fiestas d’o Pilar.

O concello sinyala que, dende 2007, se ye vivindo una gran puyada en a presencia de piraguas y remers en o río, seguntes os datos d’as federacions aragonesas de Piragüismo y Remo. De 60 piragüistas federaus en 2007  s’ha pasau a quasi 200 en 2012. Arredol de l’azute se ha creyau una zona d’entrenamiento que s’adhibe a la que ya bi heba entre o Club Helios y o Nautico.

A las actividatz esportivas tamién se i adhiben as d’educación medioambiental, en colaboración con o prochecto VonluntaRíos. Entre as actividatz d’ista anyada se tornarán a fer as visitas guidadas os domingos d’agüerro, una epoca “buena ta descubrir os cambios que se fan en as riberas de l’Ebro en pasar por a ciudat, ya que os arbols cambean as colors suyas y bellas aus s’achuntan ta migrar y atras i plegan t’acompanyar-nos dica la primavera”, dicen os organizadors d’a campanya.

Antimás, o Centro Ambiental de l’Ebro aculle, dica o 31 de chulio, una exposición titolada “Leva-me ta l’hortal”. Más enta debant, en o mes de setiembre se podrá viyer-ie atra exposición sobre accesibilidat t’as zonas verdas d’a ciudat, basada en un estudio feito d’entre o Concello y a Universidat de Zaragoza. Ta octobre, o cierzo como elemento meteorolochico y d’identidat, será o protagonista d’unatra exposición.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.