Prencipia la programación cultural de Veruela Verano

Mientres tot lo verano Veruela rebutirá d'actos culturals

cartelIste sabado 6 de chuliol prencipia a progamación cultural d’a Diputación Provincial de Zaragoza de Veruela Verano, endrezada, una anyada más ta totz os publicos. O ciclo contará con mosica, teatro ta ninos, poesía, ixotas y humor. Os actos se ferán en o Monesterio de Veruela, en Vera de Moncayo (Tarazona y lo Moncayo).

O sabado se ferá a devantadera, con o ciclo de teatro infantil “Veruela en Familia”. I podrán gronxiar-se con l’espectaclo “Las Maletas d’os payasos “Polilla y Alcanfor”. O ciclo continará o sabado 13 con l’actuación mosical de Almozandia, qui presentarán “Menuda Banda” y o 20 de chuliol con “Palabras en los bolsillos” (Parola en as pochas), un espectaclo de humor ta ninos de man de Ribalta Teatro.

Os domingos de chuliol se ferán os conciertos d’o Ciclo de Cantos Gregorianos “Cantos sonados”. I participarán tres collas d’ista mena de mosica: Schola Gregoriana Gaudium Nostrum, Capilla Fundación La Católica y Capilla Gregorianista Easo.

O sabado 27 de chuliol se ferá o Festival Internacional de Poesía d’o Moncayo por diferents puntos d’o Monesterio. Ista anyada será arredol d’a figura deLuis Cernuda, a qui se le i ferá un homenache. Mientres a chornada, “El silbo vulnerado” ufrirá una actuación especial.

O diya 3 d’agosto se ferá una chornada de ixotas aragonesas baixo o titol de “Recuerdos de ayer y hoy” (Remeranzas d’ahiere y hue) y o diya 4, a colla B-Vocal ferá una actuación d’humor y mosica a capella.

Entre o 5 y o 9 d’agosto se ferá o Ciclo de Mosica Clasica con os conciertos “La Música española para Tecla. Escuelas Pianísticas Aragonesas”, a cargo de Alvar Rubio, “Homenaje a Eduardo del Pueyo” interpretau por Patricia Montero y “Trío con piano en la música española”, con Daniel Francés, María Cabezón y Mª Ángeles Fernández. O ciclo rematará con o recital adedicau a lo compositor Johannes Brahms con a enchaquia d’o 170 cabo d’anyo d’o suyo naiximiento y a on que participarán María Cabezón, Juan Luis Royo y Álvar Rubio.

D’agosto tamién se ferá o Festival Mosica Viva a on que se podrán viyer os conciertos de Café Quijano (10 d’agosto), Anni B. Sweet (17 d’agosto) y Carlos Núñez (24 d’agosto). Totz os actos son de baldes, fueras d’istos zaguers conciertos que tendrán un pre de 10 euros.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.