Prencipia o chuicio d’o Prestige que plega diez anyos tarde

Hue ha prencipiau o chuicio por o fundimiento d'o petrolero Prestige en 2002, diez anyos dimpués d'a mas grau esferra ecolochica en Galicia

Voluntarios escoscando a costa dimpués d’a esferra d’o Prestige (Foto: Wikimedia commons)

Diez anyos dimpués d’a esferra, iste martes prencipia o chuicio por a destrucción d’o Prestige, o petrolero fundiu frent a costa de Galicia en noviembre de 2002 que causó a mayor esferra ecolochica d’o país en chitar sobre as rías y as plachas gallegas unas 60.000 toneladas d’as 77.000 que levaba a bordo.

L’Audiencia Provincial d’A Corunya se desplazará a o recinto ferial Expocoruña ta acullir un macrochuicio con unas cifras que fan miedo. Ye a mayor causa que s’ha instruyiu en a historia de l’Estau espanyol por un delito meyoambiental que suma mas de 230.000 folios de sumario. Y ixo que n’i habió retalles. En primeras i heba mas de 2.000 perchudicaus, agrupaus en 55 acusacions, que finalment quedoron reducius a uns 1.500. Amás, bi intervendrán 140 testigos, 27 procuradors, 70 advogaus y i habrá amán de 100 prebas pericials.

Con tot y con ixo, a chornada d’iste martes viene marcada por as memorias y a manifestación que a plataforma Nunca Máis ha convocau a las 11 d’o maitín a o costau d’o recinto. I han chilau “contra a impunidat” y ta remerar tamién que, a tamás d’os chicotz abances, Galicia “puede sufrir atro Prestige” en l’actualidat. Porque o que se decidirá en ista primera chornada de chuicio será si s’admiten nuevas prebas, asinas como belatro detal de funcionamiento. A vista quedará suspendida dica o venient 13 de noviembre y dimpués a calendata sí será especialment significativa. Será ixe día, chusto diez anyos dimpués d’o comienzo d’a trachedia en crebar-se un tanque que lanzó o buque a la deriva, quan s’interrogará a o prencipal acusau, o capitán griego d’o petrolero, Apostolos Mangouras.

Ta Mangouras se demandan 12 anyos de condena por atentau contra o meyo ambient, mals y desobediencia, os mesmos delitos que se les imputan a os atros dos miembros d’a tripulación, Ireneo Maloto, primer oficial, de nacionalidat filipina y en paradero desconoixiu, y Nikolaos Argyropoulos, chefe de maquinas.

Amás, en a cadiera d’os acusaus se posarán tamién José Luis López-Sors, ex director cheneral de Mariá Mercant y subordinau de Francisco Álvarez-Cascos, que dirichiba o Ministerio de Fomento, y que ye acusau d’imprudencia grau en provocar o rumbo erratico y incomprensible d’o Prestige mientres seis días y que fació posible que o crudo s’esparramara por os mas de 1.600 kilometros de costa de Galicia.

Dillá d’ixo, a reclamación total por mals y perchuicios en materia de responsabilidat civil puya a quasi 2.250 millons, encara que a Fiscalía presentará una preba pericial que elaboró una experta d’a Universidat de Santaigo y que eleva a cantidat a quasi 4.000 millons.

Pero o que centrará l’atención será a chestión publica d’a esferra a cargo d’o Gubierno de José María Aznar, que teneba a Mariano Rajoy a o frent de l’operativo. O Estau espanyol ye de vez perchudicau y acusau en o chuicio. Reclama 3.862 millons d’os 4.121 en os que a Fiscalía quantifica os mals d’a esferra. Manimenos, tamién puede estar declarau responsable civil subsidiario y, por tanto, que se determine que le toca pagar parte d’as reclamacions millonarias.

Amás, a inclusión de López-Sors entre os acusaus ye atra d’as claus, dimpués d’una larguisma instrucción con cinco chueces diferents. A zaguera chueza cargó todas as culpas en Mangouras y os atros dos mandos d’o buque, deixando sin responsabilidat a las autoridatz de l’executivo d’Aznar. Mesmo acceptó como perito clau a un incheniero que heba asesorau a o Ministerio de Fomento mientres a esferra. Igual que a Fiscalía, consideró que o desastre yera inevitable, independientment d’o que heba feito o Gubierno. Pero l’Audiencia Provincial revocó a exculpación de l’Administración y obligó a incluyir entre os acusaus a López-Sors. Será agora o tribunal qui determine si a chestión d’aquell Gubierno tenió parte de culpa en que a esferra ecolochica rematase por estar d’as mayors que se’n recuerdan en o mundo.

Fuent: http://praza.com/movementos-sociais/2356/comeza-o-xuizo-do-prestige-que-chega-dez-anos-tarde/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.