Prencipia o proceso d’escolarización 2013-2014

Dica o 19 d'abril se puet demandar plaza en qualsiquier d'os centros d'Educación infantil y primaria

Marco Rando (Foto: D.Ch.A.)

Marco Rando, director cheneral d’Ordenación Academica (Foto: D.Ch.A.)

Iste lunes prencipia lo proceso d’admisión d’alumnalla d’Infantil, Primaria y Educación especial. As familias podrán demandar plaza en os centros publicos y privaus concertaus aragoneses dica lo 19 de abril. Ta l’alumnalla de ESO, Bachillerato y FP, o proceso se desembolicará entre o 25 de chunio y o 1 de chulio. As solicitutz podrán presentar-se en o centro esleixiu en primer opción u por internet, si se tien firma electronica, a traviés d’a siede electronica d’o Gubierno d’Aragón en www.centroseducativos.es.

O director cheneral d’Ordenación Academica d’o Gubierno, Marco Rando, ha destacau que o proceso d’escolarización “ye un proceso de tot normalizau y as familias han d’estar-se tranquilas. O departamento d’Educación leva meses treballando ta que iste proceso transcurra una anyada más con total normalidat y ta que siga lo más transparent posible”.

Ista anyada, o domicilio familiar y o puesto de treballo contarán lo mesmo ta conseguir plaza escolar. As familias habrán de esleixir un d’os dos criterios, vinclando-se ta totz os centros que sinyalen y ta tot lo proceso d’escolarización. Ista decisión se prene, seguntes os gubierno “ta favoreixer a libertat ta trigar centro y fer más facil a conciliación d’a vida laboral y familiar”.

En o caso d’as siet areas d’escolarización de Zaragoza ciudat, se mantiene antimás o criterio d’estar linealment a un quilometro d’o domicilio esleixiu. Continan a resta de criterios de baremación, como en tot lo país: tener chirmans matriculaus en o centro u pais u tutors que i treballen, renta anyal por unidat familiar, condición reconoixida de minusvalia, familia numerosa u malotia cronica de l’alumno.

As familias podrán indicar dica siet colechios en a suya solicitut. O departamento d’Educación, Universidat, Cultura y Esporte recomienda de emplir todas las opcions en orden de prioridat por si no conseguisen plaza en o centro trigau en primer opción.

O gubierno ha ubierto una pachina web (www.centrosesducativosaragon.es) a on que se puet consultar toda mena d’información sobre cadagún d’os centros y os servicios que tien. Tamién se i puet consultar as plazas que bi ha y las que’n quedará en que se publiquen as listas d’admitius en primer opción. As familias antimás podrán conducir-se a un sistema d’información por correu electronico que les permitirá saber l’estau d’a suya solicitut.

A escolarización en Uesca.

A principal novedat d’o proceso d’escolarización t’o curso 2013-2014 pertoca a la ciudat de Uesca. O departamento ha modificau as zonas escolars “ta guaranciar l’equilibrio entre centros” y atendendo a demanda feita por o Consello Escolar d’a ciudat. Uesca tendrá agora ueito zonas escolar, una por cada centro publico d’infantil y primaria.

Iste proceso nomás afecta a los ninos que acceden por primer vegada ta un centro publico u privau concertau u a qui cambee de colechio. O Departamento creye que ista anyada demandarán plaza escolar en Primer d’Infantil bells 12.940 ninos de 3 anyadas, 140 menos que os previstos en o curso pasau.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.