Prencipia o Rally Dakar 2013 en tierras peruanas

Hue prencipia una nueva edición d'o Rally Dakar que recorrerá Perú, Chile y Archentina a bordo de coches, motos, cambions y quads. L'aragonés Paco Martínez compite en motos

rallydakar

Foto: www.dakar.com

Una nueva edición d’o rally mas famoso acucuta por l’horizont, concretament en tierras peruanas, en Lima, en a cinquena edición dende que o Dakar habió d’emigrar enta America por menazas d’Al Qaeda. Dende hue, 459 vehíclos, 189 motos, 155 coches, 75 cambions y 40 quads recorrerán mas de 8.500 kilometros que rematarán en a ciudat de Santiago de Chile, con o podio situau en l’historico Palacio presidencial d’a Moneda.

14 etapas con a mitat d’os kilometros contra o reloch, levarán a os participants dende o disierto peruano, pasando por Pisco, Nazca y Arequipa ta dentrar en Chile y pasar a escape ta Archentina, a on tendrán os participants a chornada de descanso en San Miguel de Tucumán ta menar-se dimpués ta Cordoba. Continará a competición enta La Rioja y Fiambalá, ta tornar ta Chile en Copiapó ta rematar en a capital, Santiago de Chile. Respective a la dificultat ista anyada, seguntes os organizadors, “empecipiamos mas fuerte que os anyos anteriors, s’atura una mica a dificultat a mitat ta puyar de nuevas a la fin“.

En a categoría de coches, puede que sigamos debant d’una edición mas ubierta, con a luita entre l’equipo Mini All4 Racing, con Nani Roma y o ganador de 2012 Stéphan Peterhansel y o nuevo equipo Qatar Red Bull Rally Team, que cuenta con Carlos Sainz, ganador de 2010 y Nasser Al-Attiyah, ganador de 2011. O rendimiento d’os “buggies” d’iste equipo ye una incognita. Tamién cal parar cuenta en Giniel De Villiers con Toyota Hilux V8 y tercero en a pasada edición.

En motos, destaca l’ausencia de Marc Coma, subcampión de 2012, por una lesión en o huembro cucho que se fació en octubre en o Rally de Marruecos. Cyril Despres, ganador l’anyada pasada y un d’os grans dominadors d’ista corrida chunto con Coma, se convierte en o favorito a ganar ista edición. Talment puedan fer-le uembra Helder Rodrigues, d’Honda, tercero en 2012, Joan Barreda u o chileno Francisco “Chaleco” López.

En cambions, l’equipo Kamaz se perfila como favorito ta lograr a victoria final con Eduard Nikolaev y Ayrat Mardeev, con o ganador de 2012, o neerlandés De Rooy como gran rival.

En quads, Marcos Patronelli (Yamaha) prencipia como favorito. Con l’ausencia d’Alejandro Patronelli, os polacos Rafal Sonik (Yamaha) y Lukasz Laskawiec (Yamaha) serán os suyos maximos rivals.

Destacar a participación femenina, que ista edición cuenta con cinco mullers, tres en motos y dos en coches. Son Laia Sanz, Camelia Liparoti y Josefina Gardulski en motos, y Stefani Manns y Martha Mariño en coches. Todas prebarán d’emular a Jutta Kleinschmidt, ganadora en coches en l’anyo 2001, encara en tierras africanas y que estió a unica muller dica agora que ha ganau ista preba.

O Rally Dakar contará tamién con participación aragonesa. Paco Martínez, un piquero teruelano, será l’unico representant aragonés en o duro rally. Competirá en motos, a on ya lo fació l’anyada pasada. En 2012 habió de competir sin garra refirme, construyendo-se a suya propia moto, correndo y fendo de mecanico de vez, con meyos precarios. Con tot y con ixo, remató en una meritoria 78ª posición. Ista anyada, l’equipo Kawasaki se fixó en ell y l’ufrió un puesto como “mochilero”, u siga, un participant que compite y aduya a o suyo lider. Martínez pilló o testigo de Victor Rivera, de Casp, que en 2006 consiguió un 36º puesto en a clasificación final en motos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.