Prencipia un nuevo curso d’astronomía en o Centro Astronomico Aragonés

O curso amostrará conoiximientos chenerals sobre as estrelas.

Curso d'astronomía (Foto: Espacio 0.42)

Curso d’astronomía (Foto: Espacio 0.42)

L’intrés por o espacio en Aragón ye bien vivo y muestra en ye o “Curso ta prencipiar en l’Astronomía III” que prencipiará iste viernes 17 de chenero de 20:00 a 22:00 y durará quatre semanas. O profesor suyo será Carlos Garcés, historiador y miembro de l’Agrupación Astronomica de Uesca. As clases se ferán en as instalacions d’o Centro Astronomico Aragonés, Espacio 0.42, en Uesca.

Dende as 22:00 de cada sesión, se alufrará o ciel, si as condicions de l’orache lo permiten, ta aprender a reconoixer con a uellada as estrelas más importants d’o ciel d’hibierno y as suyas caracteristicas principals (distancia, sistemas dobles u multiples, etapa d’a vida de cada estrela, etc). Se recomienda de levar-ie uns prismaticos de relación 7 x 50.

Ta participar en o curso no cal haber feito antis os cursos I y II. Ista edición penderá en una serie de clases teoricas sobre as caracteristicas chenerals d’as estrelas, o Sol, estrela que se troba a metat d’a vida suya, o naiximiento y muerte d’as estrelas y as estrelas d’hibierno. Un d’os obchectivos d’o curso ye fer una colla perén d’alufradors, que s’achunte alto u baixo cada mes mientres 2014, anyo d’o vinteno cabo d’anyo de l’Agrupación Astronomica de Uesca, ta ir estudiando como cambea l’aspecto d’a esfera celeste mientres as estacions y as estrelas y constelacions mas caracteristicas de cadaguna d’ellas. T’apuntar-se-ie cal contactar con 974 234 593 u info@espacio042.com.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.